精讀兔年地運 西北區Sure Win

星期天亦是大年初四，大家又可以放多一日假，唔使開工，新正頭做咩好呢？建議大家不妨出外走走，睇吓各區樓盤都不失為一個好節目，今日找來玄學家梁瑋鈞，為大家講解兔年各區置業心水，無論想上車定係換樓嘅朋友，記住要精讀呀！

據玄學家梁瑋鈞表示，今年辛卯兔年屬金木交戰嘅一年，經濟會有唔錯嘅發展，特別係上半年，有錢投資嘅朋友，會有唔錯嘅收益，而房地產更會有不俗嘅升幅；但要留意踏入9月後，會因為人為或者政策出台，導致經濟放緩，甚至出現倒退嘅情況，而且跌勢好急，幅度亦較大，大家要注意啦！

旺運地區:西北　財運佳

今年香港嘅地運以西北位最好，有八白旺財星飛臨，即元朗、屯門一帶，喺呢區無論做生意或者買樓都會有好回報。

催運貼士：在家中的西北位一排過擺放8粒石春，吸納財氣。

正西　添喜慶

正西位有九紫喜慶星降臨，家住荃灣、深井、美孚的朋友會有喜慶事發生，如升職、添丁或者婚嫁，而喺呢區投資房地產，短炒定必獲利。

催運貼士：在家中正西位擺放兩個大粉紅水晶球，有助催旺喜慶事情。

東北　旺桃花

今年東北位有一白桃花星出現，家住大埔、馬鞍山、西貢嘅朋友人緣運大增，生意亦大旺，未婚嘅朋友會有新戀情，特別係女性，桃花特別暢旺。喺呢區置業，姻緣運及人緣運大增外，層樓更唔憂賣唔出。

催運貼士：在家中東北位擺放一個白水晶球，吸納桃花之氣，人緣更暢旺。

西南　利學業

西南位遇四綠文昌星，家住九龍西、港島中西區嘅小朋友，讀書特別聰明伶俐，而考公開試嘅朋友亦會取得好成績，事業晉升試亦都一樣，所以喺呢區賣樓唔憂冇買家，因為每個父母都希望子女讀書成績好，仲唔搶住買呢區啲樓咩！

催運貼士：在家中西南位擺放4支水種植物，有助提升考試運。

失利地區:正東　遇瘟神

今年要小心正東位，皆因時值五黃位，遇到瘟神星，會是非不斷、意外頻生及易生病，所以今年置業不宜選購觀塘、將軍澳等地區的樓宇，家住呢區嘅朋友今年就要特別留意健康。

化解方法：在家中正東位一排過擺放6個銅錢，便能將瘟神之氣阻擋，有助消災解難。

正南　易生病

正南位有二黑病符星飛臨，所以亦要打醒十二分精神。家住香港仔、黃竹坑嘅朋友容易患上慢性疾病，就算驗過身體冇病，但總係周身唔舒服，所以呢區嘅樓價幾好都咪制！

化解方法：在家中正南位擺放一瓶安穩水，將病符之氣轉化，有助家人遠離疾病。安穩水做法：用透明玻璃瓶或盛器，注入開水及大量粗鹽，攪拌後放入6個銅錢並圍圈，字要向上。

正北　惹官非

正北位因有三碧是非星當令，唔使講一定係是非多多，所以居住粉嶺、上水、天水圍一帶嘅朋友要小心，如果撞啱今年生肖沖犯太歲者，更容易惹上官非。想喺呢區置業嘅朋友，就要三思。

化解方法：在家中正北位擺放一張紅色地氈，將是非之氣阻擋，有助家人逢凶化吉。

東南　呈平穩

東南方即港島東南地區，今年有六白名譽星，居住呢區嘅朋友今年發展平平，打工仔日日有工開，但想發達就冇你份，樓盤亦唔會有大升幅。

化解方法：在家中東南位擺放一張圓形白色地氈，將名譽之氣轉化，有助萬事如意。