麥玲玲 × 小儀戀愛大作戰

麥玲玲與小儀，兩位細細粒但口齒伶俐的事業女性，一個御夫有術，一個極恨姻緣到。兔年伊始，兩人教教一眾待字閨中的港女如何在男人堆中游走，又或在眾女之中出奇制勝，尋得幸福的着落！

麥︰麥玲玲

小︰阮小儀

Q︰記者

Q1 你哋一個派利是、一個收利是，可否分享一吓趣事呢？

麥︰可能年年新年娛樂圈都冇乜新聞，原來娛記會拆開啲利是影相，比較吓藝人、歌手派幾錢利是！好彩上年都封咗一舊水！其實派利是係一件開心事，我(逗)利是經驗少啲，因為好細個結咗婚！哈哈！反而想知小儀收利是時，有冇受姨媽姑姐的壓力呢？

小︰年年都有，成日都有！經常聽到「收埋今年好啦！」我心諗；「你有冇咁孤寒呀？﹗」好彩我面皮厚，仲帶埋隻狗去拜年添！

Q2 玲玲師傅不如講吓小儀今年桃花運如何？

麥︰小儀今年桃花運勁啊！冇問題！今年佢的生肖為合太歲年，利人緣，應該可以識到唔同層面的人，所以記得要着多啲紅色衫，先會旺桃花、有仔溝o架！

小︰哈哈！真係咁好？不過唔好唔信邪！我早幾年試過找一棵合眼緣的桃花，仲要係某酒店門口又大又靚那一棵，圍住桃花轉3個圈，最後仲要執埋地上的桃花碎，攞個利是封包好，然後放响銀包！嗰幾年人緣同桃花都唔錯呀！

麥︰嘩！連桃花碎都執埋，真係貪心！

小︰梗係啦！我仲等運到？一於主動出擊！

Q3 兩位都係事業型女性，可否講吓應該點樣侍候男人？

小︰這方面一定要問師傅，佢係一個新潮的老婆！放個老公去玩！其實我覺得愈唔畀男人出去玩，佢就愈會偷偷出去！

麥︰係！我一向實行「唔Check、唔問、唔睇」！正所謂壓力愈大、反抗力愈大，男人其實好怕壓力，但女人唔明，反而會問「我對你咁好，點解你唔識欣賞？」其實大部分男人只係唔知點樣去多謝身邊的女人或為對方付出，所以寧願輕巧一點；加上男人原來喜歡照顧人及被女人欣賞，所以女人對男人，真的不用照顧得太過火。

現今女性經常有「唔結婚唔好埋嚟！」諗法，這樣下去雙方站在樽頸位，永遠埋唔到一齊。其實雙方都可以先作嘗試！男人到最後會覺得「當初其實冇諗過娶，點知到最後原來唔捨得丟！」相反，如果女人在感情萌芽初時已嚇窒對方，雙方根本無機會發展下去！

小︰相對於一般女性，出名的女性更難發展感情。過往亦曾問男朋友們會否介意被偷拍，但其實真係無辦法，根本冇得避！好多時啲男人唔係怕畀人跟，係怕被人家指指點點。

Q4那麼女人應放感情還是事業在第一位？

小︰我是一位可以為感情放棄好多嘢的女人！如果揀陪朋友定陪男朋友，我一定揀陪男朋友！重色輕友！

麥︰有時女仔將感情放得太重。其實人生裏有事業、宗教、朋友、家庭和興趣等各方面，好多人就將愛情這條「支柱」放得太高，睇得太重！單身男人永遠唔會騰騰震，但女仔無拖拍就會有寂寞的感覺！因為女仔實在太喜歡拍拖及被愛的滋味啦！

Q5會否覺得港女很難覓得好男人？

麥︰幸好我嫁得早！政府提供男女適婚數字係1,000女性VS 900多位男性，可見市場上愈來愈唔夠男人！好男人就更難找！內地男人有錢，但文化、品味及背景不同，始終同香港人難相處。

小︰所以以前經常講寧缺莫濫，但依家應該改一改做「寧濫莫缺」。絕非濫交，而係女性可以嘗試接受唔同類型男士追求，總好過「缺貨」！我身邊好多性格保守的朋友，但估不到原來佢會接受不同男士追求！所以女士大可本着「去咗先」心態，因為女人幾年唔拍拖會有陣「唔拍拖嘅味」，令男仔不敢埋身；我有一個朋友，Keep住有拖拍，其他男仔見到就覺得有一種吸引力，想知道「你有咩咁把炮！」所以女人一於要濫得有性格。

麥玲玲 Profile

別號︰玲玲師傅

年齡︰秘密

狀況︰已婚

職業︰玄學家

強項︰風水命理

嗜好︰鑽研風水學說

＊農曆新年前非常忙碌，所以呢幾日要抖吓！

繼Rap歌、瘦身、拍戲及舞台劇後，最新搞作是同商場Crossover出版了一本《HomeSquare ×麥玲玲 兔年家宅增運天書》，教人兔年催運！

新年喜歡在家擺放蘭花，顏色鮮艷又夠清雅，襯托一身紅色及桃紅色衫就最靚！

小儀 Profile

別號︰小儀

年齡︰秘密

狀況︰單身

職業︰電台DJ、

節目主持

強項︰烹飪

嗜好︰同愛犬DeeDee玩、煮嘢食、同朋友飯聚吹水

＊ 忙完舞台劇《戀Love Love》，演出時也感受到戀愛的甜蜜，期間又可以同一班朋友一齊玩一齊癲！

準備過年，雖然未嫁，但仍會準備利是予工作上的好拍檔！因為大家都辛苦咗成年。

婆婆年初二生日，每年都會出街食飯，今年一樣邊食飯邊睇煙花，婆婆好開心！

後記:擴大愛情版圖

港男喜歡北上尋歡，港女也愈來愈愛於內地尋真愛。適婚男女數字失衡，引起的除是小圈子女人圍埋吹水的題材，也是一個社會性問題，事業女性也好，小女人也好，女人天性如此。各位姊妹，一於學玲玲師傅及小儀話齋「擴大愛情版圖」，兔年人人品嘗甜蜜愛情之味！