遊車河催運　直踩東北方

大年初三赤口日，唔拜年做乜好？計我話遊車河行大運就最啱數，順道可以拜神祈福嘛！據玄學家林炳南師傅講，今日嘅大利方向係東北方，擇好時辰向住呢個方向出發，師傅話可以轉出好運來，同屋企人或拖友行大運都唔錯吖！

雖然今日係赤口，但係話晒係新正頭，正係催旺運氣嘅好時機，至於時辰方面又點揀呢？聽聽玄學家林炳南師傅教路：「今日屬辛卯日，最有利嘅方向係東北，以香港嚟講，即係將軍澳、西貢或新界北部一帶，吉時由卯時至午時，即係早上五時至下午一時，全屬大吉時段。」

吉時長達八個鐘

大家咪誤會想遊車河行大運，就要一直行車，仲要行勻晒咁多個東北區先得，其實只要向東北方行，已經應到行大運嘅意頭。由於今日嘅吉時開始得比較早，睇怕好多人都未起身，不過整個吉時有成八個鐘，夠晒時間，所以唔使急，食完早餐再出發都未遲，今次我哋以中九龍為起點，向東北方向行，就有以下嘅推介景點。

行運站站通:第一站：有求必應黃大仙

香港人冇理由唔識嗇色園黃大仙祠，農曆新年點都要到此一遊，況且今年係嗇色園90周年，上個月新增太歲元辰殿，善信可向黃大仙祈福外，仲可以按不同生肖，到太歲元辰殿參拜。

小貼士：過年係到訪黃大仙祠嘅高峰期，加上祠內增加咗新殿，預期會有大量善信前往，而黃大仙祠嘅開放時間為早上七時至下午五點半，所以都係早到為妙。

第二站：跟傳統拜車公

拜完黃大仙，就正式向東北方出發，駛入新界喇，最快遇到嘅祈福廟宇，當然係沙田車公廟啦！雖然車公誕係正月初二、三月廿七、六月初六及八月十六日，不過因為赤口唔拜年嘅關係，所以好多人都喺初三拜車公，今日到此一遊實冇錯。

小貼士：到車公廟除咗轉風車，記住仲要擊鼓呀，原因當然唔係鳴冤，係通知車公元帥一聲你嚟咗，正所謂入屋嗌人、入廟拜神嘛，想轉好運就大力啲喇！

第三站：林村許願樹

拜過神仲嫌唔夠喉，想許番個兔年宏願？唔爭在踩多轉，揸車去埋林村許願樹。去到大埔林錦公路放馬莆村旁，雖然原本嗰棵許願樹仲要靜心休養，不過旁邊都有棵25呎高人造細葉榕及祈福架，仲有輕身嘅塑膠橙綁上寫好各種願望嘅寶牒，善信可以照樣擲寶牒上樹，每份盛惠$20。而且年初九至正月十五仲舉行各式許願節活動，有興趣不妨嚟多轉。

小貼士：林錦公路一帶車位唔多，泊車有啲困難，搵車位要畀多少少耐性。至於許願樹旁邊有餐廳可以歇歇腳，日間仲有山水豆腐花賣o架！

赤口有口福

去咗咁多地方，睇怕時間都唔早，肚餓未？一場嚟到大埔，不妨去埋大美督醫肚。汀角路大美督巴士站對面嘅大尾篤村食肆林立，最特別係有多間泰國餐廳，冬陰公湯、泰式雞飯及串燒等惹味食品多不勝數，赤口唔嗌交，試吓辛辣口福都得o架！大美督巴士站附近有大型停車場，但要留意上址設有咪錶收費及免費停泊兩種車位，泊車時要睇吓環境。

汽車查詢：2927 3388（Volvo Cars HK）