on.cc 東方互動主頁

掃倉預告玩具迷儲定彈藥

經過大掃除，丟咗啲雜物、垃圾之後，玩具迷會唔會心思思，見屋企有吉位，就想買番啲心頭好「補倉」呢？今年嘅新春活動，唔只拜年，仲可以「掃倉」！瑞華行就於下周一至周三，喺青衣搞個「玩具滿屋迎新春」傾銷活動，唔只有高達及「拉打」模型，就連Hello Kitty及Winnie the Pooh都有份割價促銷，一家大細嚟到，無分老幼，想唔滿載而歸都難！

今年瑞記未過年已經喺銅鑼灣先嚟個小開倉，嫌未買得夠喉嘅話，今次嘅新春大開倉就咪錯過，而且精選推介Day Day唔同，款式繁多，記住初一至初四勤力拿利是，唔係邊夠彈藥「掃倉」。

UC高達限量半價

呢排《高達UC》人氣高企，啱啱公布埋OVA第三集會喺4月出BD碟，劇中登場嘅機體，自然會喺MG及HGUC模型系列排住隊出，趁住夠Hit，主角機獨角獸及新安洲今次就以半價限量發售，賣晒就冇，依家日圓咁高水，要補貨就咪錯失時機。唔只高達，就連幪面超人模型都一樣咁Hit，之前W系列MG Cyclone Joker，黑撞綠型到痹，依家開倉價唔使兩舊水就有交易，唔買冇朋友！

Hello Kitty煮飯仔

除咗模型，倉內仲有大量動漫Figure完成品，都幾啱小朋友，高達粉絲必揀Robot魂系列，幾十蚊有交易；戰隊迷可以揀《魔法戰隊》玩具，就連多款拉打同機戰常客《電腦戰機Virtual On》都有平貨。女仔想玩煮飯仔嘅話，唔只有「快趣廚房系列」，就連Hello Kitty都陪你玩埋一份呀。

扭蛋盒蛋大割引

會場仲有「着數碌碌」扭蛋區，大量扭蛋以$2或$5低價吸客，有軍曹又有Mario，食玩區亦有大量平價盒蛋，好多都係新款式，部分仲以一Set過發售，等你儲齊成套。另外，但凡購物單一收據滿$300，可以優惠價換購精選貨品；買滿$500仲有抽獎機會一次，滿$800就抽兩次，分分鐘贏到總值$500嘅豐富禮品包，新正頭掃平貨，仲可以試試運氣，攞個好意頭。