《Raving Rabbids Travel in Time》　賤兔應景惡搞

可能知道嚟緊係兔年，所以賤兔都要喺新作《Raving Rabbids Travel in Time》中發力，還原基本步繼續大玩過癮抵死嘅體感Mini Games。睇見個遊戲名都應該估到主題會同時光旅行有關，今集就講賤兔迷失博物館，坐住時光機重返古代玩埋啲搗蛋遊戲，合共提供咗20個歷史主題區，兔年玩就最夠Fun！

其實年幾前推出嘅《Rabbids Go Home》，諗住玩吓新意轉成冒險形式，但坊間反應就冇之前嘅Mini Games玩法咁得民心，所以到《Raving Rabbids Travel in Time》就還原基本步，仲加入大量滿Fun嘅Mini Games。

坐洗衣機 回到過去

新一集古仔大玩時空轉移，一如電影《翻生侏羅館》般將遊戲舞台搬到博物館，但就唔係玩蠟像或標本翻生，只需要將隱藏喺藝術品後嘅古怪秘道推開，就可以坐上造型好搞鬼、兼由洗衣機改裝而成嘅時光機，重返過去惡搞一番，好似會見到原始人鑽木取火，又或者獅身人面像被打爆鼻等場面，貫徹鬼馬本色。

多人對戰 互搶加分

遊戲內收錄咗5大類型遊戲，合共20款迷你遊戲，當中好似有扮西部牛仔射廁所泵、拍翼飛上天鬥搶氣球，或者鬥快在滿布機關的賽道上暴走，玩法唔太難，但勝在好有趣。每個小遊戲都支援多人對戰，基本上可以靠搶奪其他玩家嘅成果為自己加分，如果搵齊四位朋友一齊玩，肯定勁過癮！操控方面，主要都係看圖識字，只要望住畫面上嘅提示就識得點操作，而且今集更支援到Wii Motion Plus，連微細動作都感應得到，抵讚。

沿途搜集 靚靚古裝

今次雖然係日版行貨，但一樣可以支援到網絡連線功能，就算新年期間無嘢做，都可以透過網絡同朋友齊齊穿梭時空。喺《Raving Rabbids Travel in Time》內仲可以開設群組，將遊戲所得嘅分數同獎盃等成就，跟其他朋友分享，令歡樂散播到全世界。今集遊戲以時空穿梭為題，除咗用場景惡搞各歷史故事之外，亦可以在遊戲過程中為賤兔蒐集各款「古裝」，包括有印第安人、拿破崙、凱撒大帝甚至乎係木乃伊等30款古裝服飾畀賤兔更換，只要行到博物館嘅衣帽間，就可換過件靚衫繼續玩，首批遊戲更會附送一隻古裝系列賤兔公仔，想儲就要快手。

查詢：2418 8896

遊戲檔案

類　　型：Party Game

開　　發：Ubisoft

平　　台：Wii

推出日期：已推出

售　　價：$399（日版）