糖兄×糖妹Sweet迎扭耳

小時候最喜歡過農曆新年，除了收利是，還有大堆糖果吃。講到糖，即時想起樂壇唱作組合「糖兄妹」，佢哋認為糖果要慢慢「梅」才可嗒出真味，就如聽他們的歌一樣。扭耳（New Year）將至，這對「兄妹」不僅要和大家分享新年感受，仲要同大家拜個早年！

兄：潘雲峰　妹：黃山怡　Q：記者

Q1： 有沒有難忘或最開心的新年回憶？

兄： 最開心莫過於可以和家人及平日少見面的親戚相敍。我家逢年初二會聚在一位親戚屋企齊齊吃飯、睇煙花和玩魚蝦蟹，而今年應該會特別少少，因為我要幫大家在剛推出的首張大碟上簽名，哈哈！

妹： 最難忘是小時候跟家人返內地向婆婆拜年。去年參加公司春茗亦最開心，因為有嘢食又有獎抽，我仲抽到部PSP添！

Q2： 你們最愛吃邊款糖果？

兄： 喜愛某牌子的杏仁糖和果仁朱古力，前者花生碎夠多，後者榛子味濃，都是我的最愛。

妹： 同糖兄一樣，都是愛吃某牌子的杏仁糖，貪佢好咬口又夠甜，正！

Q3： 新年利是一般有多少進帳？通常會點用？

兄： 一般都是一、二千蚊，讀中學時會用來買自己喜歡的東西，例如試過將利是錢加少少積蓄買了第一代PSP遊戲機，近年則會用利是錢請家人和朋友食飯。

妹： 1萬……我都好想呀！朋友每年都可以收到過萬元利是，真是羨慕死人！我每年都只收得很少利是錢，通常都唔過$2,000，用來交一期「保費」就最啱。

Q4： 正所謂一年之計在於春，兩位今年有甚麼新年大計呢？

兄： 來年在音樂製作方面將會有更多元化的發展，另外已準備好進軍台灣樂壇。

妹： 過往付出的努力，終於有少少成果，嚟緊我會繼續填多啲好詞，唱多啲好歌。今年我仲想可以延續去年環保、禁毒大使身份，Keep住為社會出分力。

Q5： 兩位有甚麼新年願望？

妹： 阿哥（阿峰）應該想減肥成功？

兄： 這不是我的願望，應該係阿妹（Kandy）的願望至真！

妹： 我咁Fit，唔使減肥啦，希望快高長大至真，哈哈！講笑咋！我當然希望愈來愈多人鍾意聽我哋啲歌啦！嚟緊會推出第一首廣東歌，希望大家一聽便愛上。

兄： 至於我嘛，希望糖兄妹無論在香港或台灣發展都OK啦！

後記：兩個大細路

　阿峰同Kandy在訪問開始前，見到小記為他們準備的糖果已兩眼發晒光。阿峰第一時間問：「啲糖我食唔食得o架？」Kandy更不禁打開全盒攞糖食，十足大細路一樣。雖然這兩個大細路都未結婚，但原來佢哋早就有派利是畀細佬妹嘅習慣，做佢兩個細佬或細妹真好。

黃山怡Profile

別號： Kandy、糖妹

年齡：20+

狀況： 未婚

職業： 唱作歌手

強項： 食嘢、氹人開心

嗜好： 皮飾手作DIY

＊ 早前和糖兄分別為電視台拍攝兩個單元劇，將會在情人節播放。嚟緊會推出新廣東歌，又會到台灣宣傳新碟，亦會為香港首個演唱會展開籌備工作。

最愛師弟的《第一課》

師弟倪安東的新碟好多歌都好動聽，尤其是與大碟同名的《第一課》最得我鍾意。此外，大碟內還有不少佢拍攝唱片封套時的花絮相，好型仔。

紅色MJ睫毛液

早前朋友送我一支MJ特別版紅色睫毛液，成為近來的必備妝物，農曆新年更是大派用場。

潘雲峰Profile

別號： 阿峰、糖兄

年齡：30+

狀況： 未婚

職業： 音樂製作人

強項： 隨時可彈唱任何動漫歌曲

嗜好： 上網睇Forum

＊ 嚟緊會為非本地機構展開音樂製作工作。

真摰歌曲之選

周國賢的《絕望的謊容》，講及時下少女多用化妝來美化自己，其實人最自然的一面就是不化妝，聽完相當有同感，就如我們做音樂，不多修飾，予人的感覺反而更直接和真摯。

DIY雙鏡相機

早前買了本《大人之科學》，附送DIY 35mm雙鏡相機。在裝嵌過程中了解到相機的構造及影相原理，而相片質素都唔錯喎！