C30撞到正唔漏電
用家庭電器都要慎防漏電，揸電動車嘅話，萬一發生撞擊令供電系統漏電，咁咪好危險？為咗加強車迷對電動車嘅信心，富豪（Volvo）喺本月嘅北美國際車展上，發表咗一段C30電動車嘅撞擊測試片段。雖然外形同汽油版一樣，不過電動版嘅內藏布局，就同汽油版有幾大出入，例如車頭冇咗引擎，改放較輕、較細嘅電動馬達，而油箱及傳動軸就變成鋰電池。喺呢段短片中，X光影像下嘅綠色部分，就係電池組位置；充滿電嘅C30電動版以64km/h進行正面撞擊，電池組附近嘅感應器喺撞擊後嘅50毫秒內就切斷電源，而且同撞擊前相比，綠色位置並冇明顯改變，證明車架可以穩陣Hold實電池組，以免破損、移位，大大防止漏電嘅機會。想睇片？唔使飛去美國，Click入http://www.youtube.com/watch?v=VfhLBk0SWjs任你睇。
以64km/h直撞，成個車頭冇晒，氣袋又脹晒，電池組仲有冇得剩？
放心，50毫秒已經切斷電源，綠色嘅電池組亦都Hold得穩，並冇移位。
