Arc Touch Mouse 孿都拗得直
微軟隻Arc Mouse本來就以型字掛帥，弧形設計更好有Design味，不過要「屈尾」擺落袋拎住周圍去就略嫌大嚿兼唔方便，但新出嘅Arc Touch Mouse就完全解決咗呢個問題。Arc Touch Mouse除咗可以維持到個獨特嘅彎曲Arc Shape外，仲搞鬼到可以將滑鼠拗直，最薄之處更只有7mm，加埋輕觸式捲軸，設計都幾革命性！
拉直變形 容易收藏
今次Arc Touch Mouse主要在纖薄同可攜性方面落工夫，既保留Arc Mouse原有嘅型仔設計，仲針對性地在細部着手，令滑鼠變得更薄，更易於攜帶。其中一大突破就係新滑鼠尾部可以任拗，要變形為Arc Shape或者2D平面都好容易，而且當拗直後，Arc Touch Mouse鼠身最薄之處只有7mm，最厚嘅地方都只係15mm，比起之前Arc Mouse摺疊式設計更易收藏。當然，呢個拗得直嘅設計，好睇之外亦有實際用途，只要拉長滑鼠後就會自動截斷電源，幫你慳電。
輕觸捲軸 靠上下捽
要造得咁薄，Arc Touch Mouse更飛走Arc Mouse原有嘅滾軸鍵，改為用上多功能觸控鍵，靠捽就可上下捲動又或者Double Touch開新頁，難怪隻新滑鼠叫做Arc Touch啦！小記試用後，覺得滑鼠手感相當好，而且在枱面上操作極暢順，皆因佢亦用上微軟嘅BlueTrack技術，感應度高，亦可對應不同的表面，雖然五百多元一隻唔算平，但都算物有所值。
查詢：2388 9600
對比上一代Arc Mouse（後），Arc Touch明顯收身成功。
首次加入多功能觸控鍵，不過就唔似Apple隻Magic Mouse咁可以玩埋Multi-Touch。
$529
只要在Arc Touch Mouse尾部加力，即可將滑鼠拉直拗彎。
微軟仲會加推青花瓷設計嘅「藍光‧加冕彩繪兔形圖案別注珍藏版」滑鼠連Notebook袋，限量推出500套。$338/套
附上迷你無線接收器，還可用磁力貼在Arc Touch Mouse底部。