考起物理人《Bubble Ball》
雖然小記身邊有唔少理科出身嘅同事，但估唔到成班大人都搞唔掂呢隻小遊戲，講緊嘅係能夠擊敗《Angry Birds》兼啱啱成為香港Top Free榜首嘅《Bubble Ball》。
畫面簡單 難度超高
遊戲玩法好簡單，大家只需將泡泡球碌到旗桿目的地就可以過關，每一關都會有唔同嘅物件幫你過關，不過要計埋引力、角度、力度等因素，絕對唔係想像中咁易！
講畫面，《Bubble Ball》只係用上簡單線條、2D圖像，不過勝在難度高，好有挑戰性。可用嘅道具分別有木條、鐵條、Powerups加速器、減速器同埋重力轉換器，用家就要靠呢幾樣道具令到個波碌到去終點，不過千祈唔好睇小佢哋，隨時重玩幾十次都未必過到。不得不提嘅係遊戲開發者竟然係一名只得14歲嘅美國小童，唔使問都肯定係一名天才！
圖中嘅第20關都幾難搞，小記玩咗十幾次都過唔到，激氣！
短時間就成為香港Top Free首位，就知有幾受歡迎啦！
玩之前最好睇下「How to Play」，掌握道具嘅用法。