iHome iA63 打橫嚟睇

買得iPhone迷你音響組合，都預咗喺睡房使用，瞓喺度聽歌，的確爽到震！但奈何呢類組合只配備直立式Docking，手機只能垂直擺放，聽歌還可以，睇片就免問。最新的iHome iA63便全球首度引入「遙控自旋底座」，個掣就可以逆時針轉動打橫部iPhone，睇片更Free更盡情！

每年美國CES剛過去，本地Apple配件代理商LRT便有新搞作，今年亦唔例外，更一口氣展出旗下iHome、Lingo、POWERMAT及SwitchEasy等多個品牌的新產品，而當中最受注目的，便首推剛獲得CES 2011設計及工程大獎的iHome iA63。

遙控旋轉底座

可能有人會問，要讓iPhone自動轉向有幾難？但其實要在細小音響組合內放入旋轉摩打，又能平衡機身尺寸及減低操作聲浪，技術上存有一定難度。iHome iA63之所以得獎，就在於它克服了以上困難，將微型摩打放入「遙控自旋底座」背後，用戶只要按下遙控器上的「旋轉」鍵，Docking轉盤便會逆時針90度轉向，這樣便能用盡iPhone屏幕睇片；而最抵讚嘅係轉向時沒有絲毫聲音，保證唔會打擾雅興。代理更表示，其圓形凹陷式轉盤適合絕大部分直身手機擺放，所以其他手機用家都用得着。

對應新舊iP4

音色方面，iA63配備了Reson8喇叭單元，雖然輸出功率只有6W，但聽Demo歌時，就發覺其中頻音域頗為飽滿，就算將音量開至最大亦沒有拆。唯一缺點是人聲表現較單薄，但考慮到放在睡房使用，除非開盡焚機，否則播放一般流行曲都有不俗音色。播歌以外，它還兼備充電、鬧鐘及FM收音機等功能，而且其Universal Dock對應晒各款iPhone及iPod，舊機也能順利過渡。特別一提的是，iA63還可配合廠商研發的「iHome+Sleep」iPhone App使用，安裝後用家便能透過iPhone直接控制組合的響鬧時間，或收聽多個網絡電台，將功能進一步擴充。

最輕iPad音響

iPhone以外，廠商亦照顧到iPad用家的需要，同場展出了全球首部便攜式iPad迷你音響iD9，最大特色係內置鋰離子電池，充電後便能帶出戶外使用，配合SRS TruBass技術，開P播歌時低音特別雄渾，可惜播放時間僅得5小時，若長氣一點會更佳。想音色再好啲？還有一款iD85，既備有Equalizer Controls可調節高低音頻，還提供3D音效設定，立體聲表現更出色。iD85另內置雙鬧鐘，用戶可從iPad、FM收音機或其他藍芽裝置選擇響鬧鈴聲，設定更個人化！

同場加映

iP4充電殼 Lingo iRis Battery Pack

iPhone 4專用充電保護殼，內置1,500mAh鋰電池，合共提供35小時音樂播放，還支援電源管理及數碼電台接收，絕非叉電咁簡單！

nano手錶 Minimal by Scott Wilson

出自Nike著名設計師Scott Wilson手筆，外框為航空級鋁合金，超級耐磨，錶帶則是矽膠，彈性高又唔刮手，備有銀、黑、紅3款顏色選擇。

流動無線充電 POWERMAT 2PX Rechargeable Mat

首塊毋須接駁電源使用嘅POWERMAT無線充電板，內置電池容量高達7,800mAh，帶出街都能為兩部電子裝置進行無線充電。

Bobo設計限量水晶殼 SwitchEasy NUDE Limited Crystal Edition

SwitchEasy跟本地黐石專門店Crystal Jam合作推出，圖案由Bobo（陳文媛）設計，並採用Swarovski高級水晶石，全球限量388套。

查詢︰2395 3913