山口式初號機血花四濺

標榜超可動嘅山口式Figure,今個月就會推出第100款作品,選材係《新世紀福音戰士》初號機;唔係啩,山口式初號機大大話話出咗三、四次,仲嚟?咪柴台住,新Ball Joint加夜光綠及發光地台,夠晒賣點令你貪新忘舊啦!

100號落重料

唔鍾意山口式大髀位嘅Ball Joint外露?今次嘅初號機就用咗較細Size嘅Ball Joint,加埋隱藏式設計,足以解決問題,而且成條脊骨用咗多節Ball Joint,令條「貓腰」可以輕易扭成「S」形,甚至曲體抱膝都冇難度,堪稱玩具界嘅瑜伽大師!另一方面,初號機嘅綠色位置破天荒用咗蓄光顏料,一熄燈就有夜光效果,至於地台設計成第四使徒嘅殘骸Look,唔只有血漬,心口仲係LED,令玩家重現初號機月夜怒殺第四使徒嘅情景。

查詢:2148 9483(精品)

Alfred

山口式No.100 《新世紀福音戰士》初號機 $228

仲記唔記得初號機畀使徒射爆眼一幕?裝上特效組件,就能重現前入後出嘅血腥鏡頭。

呢件細組件就係第四使徒嘅碎骨,放喺初號機手上,就可以擺番怒殺使徒嘅情景。

使徒嘅心口用咗LED,不過用塊透明血膠片扮血漬就唔多似。

貓腰抱膝咁高難度都做到,問你服未!