LG HD Combi HR550錄高清睇3D過年煲戲

雖然舊年3D電視銷量冇預期咁好，但喺今年各廠商發力研製新產品下，應該會有更多用家願意轉用3D電視。買得3D電視當然唔少得配番部3D藍光影碟機，LG最近就推出一部名為LG HD Combi HR550嘅二合一新3D藍光播放兼高清錄影機，可以趁農曆新年長假煲番幾齣3D好戲外，就算要外遊或外出拜年，都可以錄低心愛節目，唔怕錯過。

好多人嫌屋企套家庭影院組件太多，單係遙控器都有好幾個，想更加簡化？都唔係冇辦法嘅！好似LG HD Combi HR550就將3D藍光播放以及高清電視錄影功能二合一，追劇睇碟都咁方便。

500GB硬碟高清錄影

呢部新機個名叫Combi，其實都點出佢有兩用嘅意思，既可以播放到3D藍光影碟，又可以錄影高清電視節目，以內置嘅500GB硬碟計算，都可以儲存數百小時嘅電視劇集，不過就冇加入將電視節目直接錄影到藍光碟嘅功能，皆因有埋燒碟功能嘅機種，隨時要貴超過三、四千元，純3D藍光影碟播放機會較為划算。Combi HR550嘅錄影操作都相當容易，用家可以揀即時錄影或預錄，機內亦設有Time Shift功能，睇電視中途有事要行開一陣都可以錄低直播節目，轉頭返嚟又可以繼續播放，睇波時就唔會錯失精彩入球。

對應多種影像格式

小記以LG自家嘅3D藍光試片進行測試，發覺Combi HR550嘅色彩表現理想，效果都令人滿意。由於現時3D內容唔算多，3D藍光影碟片種選擇偏少，所以除3D BD外，呢部藍光錄影播放機仲支援到好多現行嘅高清影片格式，譬如有MPEG1/2/4、MKV、AVCHD、DivX、DivX HD等，仲可以透過機身前方嘅USB介面連接USB手指或外置硬碟機播片；要睇相或者聽歌的話，只要在操作介面上揀選對應嘅圖示就得。同時，Combi HR550亦支援DLNA網絡多媒體技術，可無線連接對應嘅電腦同其他影音器材，分享影片等數碼娛樂資源。

網上睇片查天氣

近期高清電視以至藍光影碟機都加入網絡應用元素，Combi HR550當然唔少得，跟其他LG產品一樣支援NetCast功能，收錄了三項實用嘅網絡應用程式，除大家熟悉的YouTube外，另外兩款分別係Picasa網絡相簿以及AccuWeather天氣預報，前者可以Upload相片跟遠方親友一齊分享；後者則方便出門旅遊時可以查閱世界各地天氣，帶備衣物都有個預算。最後喺聲音輸出方面，此機能對應到如Dolby True HD、DTS-HD MA等多種高清音效，全面滿足用家需要。

機檔案

硬碟容量： 500GB

影片格式： 3D BD / MPEG2 / MPEG4 /

DivX HD / AVCHD

體　　積： 430×49×295mm

查詢：3543 7777