實用外語Apps 旅行唔使雞同鴨講

大家都應該Plan好晒農曆新年嘅外遊行程，不過去到部分非旅遊熱點，真係講英文都未必溝通得到。點算好？咁又唔使怕，只需趁出發前上App Store「單撈」定幾個實用嘅外語App，就唔怕到時雞同鴨講喇！

各位唔好以為今次又係介紹純文字嘅外語字典咁沉悶，其實依家唔少外語Apps，唔單止圖文並茂，仲非常易用好玩，好似即時翻譯App《Word Lens》咁，只要用鏡頭對住想要翻譯嘅文字，就可即時將畫面上嘅西班牙文轉成英文，夠晒創意！

西班牙文

即影即譯　《Word Lens》

費用：9.99美元

講突破，新推出嘅《Word Lens》就相當好用，只需用iPhone鏡頭對準有文字的地方如路牌或餐牌時，就可以即時喺iPhone上見到翻譯結果，非常方便。現時《Word Lens》只設有西班牙文轉英文及英文轉西班牙文兩個版本，每款售價都係9.99美元。

看圖識字

《English-Spanish Visual Dictionary from Franklin》

費用：5.99美元

唔少語言教學App都只得文字，用落相當沉悶，但呢套西班牙語教學App就圖文並茂地教大家學識西班牙文生字，就算一啲連英文名都唔識嘅生字，如蔬菜名、食物名，都可看圖識字，有趣又實用。

法文

真人發聲　《French Menu》

費用：0.99美元

朋友即將去巴黎公幹兼自由行，想知道點樣叫嘢食。其實帶埋《French Menu》呢個iPhone App去就唔使怕，當中收錄咗法國菜菜單及點菜時用語，既有真人發聲教你讀，亦支援錄音同重播功能，可以測試下自己的發音有幾標準。《French Menu》仲收錄咗100種法國佳釀的資料，想點番支酒配主菜食都好方便。

血拚必備　《Paris Shopping》

去得巴黎當然少不了四出購物，由街頭特色小店、跳蚤市場掃到春天百貨、老佛爺百貨。《Paris Shopping》就收錄咗好多巴黎著名購物點，仲詳列每個購物點嘅特色，第一次去巴黎就最啱使，而且App內更附上購物時必備嘅法文對白，包無甩拖。費用：0.99美元

日文

詳細分類　《漢字Mini》

以為自己睇得明日文漢字？有時去到日本旅行時都會畀佢陰到，尤其當菜牌只寫漢字時更加無從發音。《漢字Mini》就收錄咗1,000組常見的植物及魚類的漢字分類，更附註平假名讀音，只要學識五十音就識得讀，免費App嚟講都算幾好用。費用：免費

快查漢字　《常用漢字辭典》

突然見到有個日文漢字唔識讀，用《常用漢字辭典》就可以快手查出所需的漢字。程式收錄了1,900多個常用漢字，每個字都會顯示出應有的音讀跟訓讀，查一查就一清二楚。費用：0.99美元