率先試玩MP09烈火文

由Takara Tomy主理,堪稱完成度最高,而且Size最大嘅老變系列「Master Piece」,一直主打G1系列角色,造型忠於原著之餘,仲大玩精密設計,所以唔理賣價有幾高,依然不乏粉絲捧場;至於傳咗好耐嘅MP第九款作品—博派第二代總司令「烈火跑車」洛迪文(Rodimus Convoy),就將於本月尾推出,筆者有幸搶先試玩,當然要同大家分享啦!

先嚟故事回顧,洛迪文原名叫火棒(Hot Rod),於1986年推出嘅動畫版電影《The Transformers:The Movie》出場,原本係衝動型嘅博派少年戰士,經歷過柯柏文臨終一幕,繼而同格威龍(由麥加登改造而成)及獨角獸等狂派大戰,最後關頭成功同能量核心結合,打贏狂派之餘,仲升呢變成洛迪文兼做埋博派新領袖,MP09又點樣演繹呢段故事呢?

掀起你的蓋頭來

其實喺動畫之中,無論火棒或洛迪文,個樣都差唔多,只係後者嘅輪廓成熟啲,MP09就以乾淨利落嘅手法變臉,玩法上類似MG獨角獸高達,揭起頭蓋,就可以轉出內藏嘅另一款面譜組件,仲跟埋護目鏡。體形方面比例適中,身短腳長都幾有動畫Feel,而且手腳都用咗齒輪關節,唔怕扭得多會鬆,不過金屬件唔多,齒輪又係塑料製造,玩嘅時候咪咁用力呀!

加塊冚變貨櫃車

洛迪文嘅第二形態係美式跑車,加個專用拖架,就結合成貨櫃車,原理同柯柏文一樣,留心啲睇,就會發現MP09嘅跑車款車頭明顯長啲,點解變做貨櫃車會短咗呢?原來有個Tricky位,拖架跟咗一塊車頭殼,將成部跑車冚住晒,就變成貨櫃車形態,真係估你唔到。跑車本身就有好多Detail位,揭起車頭玻璃,就見到細緻嘅駕駛艙,而拖架就可以變成武器庫,同MP01柯柏文一樣咁多嘢玩。

真人版第三集 Trailer有得睇

等咗好耐嘅《變形金剛》真人版第三集電影《Dark of The Moon》,據聞今年六月尾、七月頭喺香港上畫,睇戲之前,不妨先睇官方Trailer頂住癮先。內容係1969年美國太空人登月時其中一段收唔到嘅通信,背後藏有不為人知嘅秘密—月球早就有太空船登陸咗,裏面仲有勁多嘅變形金剛殘骸,其中一個對眼仲識着,未死o架!

網址:http://www.youtube.com/watch?v=3H8bnKdf654

查詢:2302 1221(Hasbro HK)

Alfred

長車頭、扁車身,加埋成身拉花,成個美國跑車Look。

本港初版行貨送限量金幣,日本都冇o架!

貨櫃車形態都有齊烈火拉花,可惜冇乜金屬件,整體膠味重咗啲。

MP09嘅最大突破位,係將跑車嘅前後位置掉轉塞入拖架,再加塊名副其實嘅車頭蓋冚住,就完成變身。

揭開頭蓋,就可以玩變臉,仲跟埋護目鏡。

心口內藏能量核心,不過Size比柯柏文嘅細得多。

MP09 Rodimus Convoy $1,579.9

打開貨櫃,就可以出動武器庫,火力大增。

估唔到變形金剛比地球人更早登月,佢哋係博派定係狂派呢?