笑住埋單　豪食6個0Belon

出街食飯，難免會遇過食物差、服務差、環境差的餐廳。畀錢換來一肚氣，何苦？位於銅鑼灣的新餐廳Belong，老闆劉先生識飲識食，矢志做到3好：食物好、服務好及環境好，務求大家食得開心，笑住口埋單。單看餐廳特別引入法國新蠔王Pied de Cheval及坊間罕見的Belon 000000，就知唔係講笑。

劉老闆有心搞好食肆，亦有力實踐，皆因食得多玩得多，識得分好壞。他笑說：「喺英國讀書生活多年，可以話上半生只係吃喝玩樂，而跟過法國人、葡萄牙人飲飲食食，先知食飯有次序，同埋學識點樣配酒。」

「度身訂造」套餐

這次開餐廳，因為劉先生有心介紹好食物，兼教大家點樣食：「食飯係要慢慢享受，唔應該趕，所以我會勸趕時間的、揸車的唔好嚟食。因為餐飯最少有5道菜，起碼會食兩個鐘；而好多食物淨食唔夠好味，要襯埋酒至得，揸車就唔可以好好享受。」這裏地方不大，但環境雅致，不會覺得拘謹，菜式以傳統法國菜為基調，偶爾加入新元素。

這裏只供應套餐，價錢由每位$500至$2,000不等，由客人定價，菜式會按個人喜好炮製，猶如「度身訂造」，最特別是一個人來食，餐廳亦會招待。$500套餐有5道菜，$2,000套餐則食得更多：生蠔、冷盤、熱盤、湯、主菜、意粉、甜品及咖啡。照理食完都好滿足，偏偏劉先生笑說還有秘密武器：「覺得未夠喉，不妨飲埋陳年砵酒，這種甜甜的極品餐後酒，用來結尾最正。」

蠔王「醉」配香檳

「客人幫襯，我必定畀最好的，有菜式唔鍾意食、唔好食，會即刻換兼唔收錢；最緊要大家食得開心滿意，咁先會有下一次。」這套開心飯理論，劉先生在訪問期間提及多次，看蠔吧內的新鮮貨，就知他所言非虛。先有特別訂造的弧形玻璃層架，令每日運來的6至8款法國蠔放得賞心悅目，當中更有法國新蠔王Pied de Cheval及Belon 000000，均屬坊間罕見。

Pied de Cheval直徑最少4吋長，像成人手掌般大，「帶子位」鮮甜無比，而Belon 000000同樣Size特大，金屬味濃郁，餘韻久久不散。劉先生教路：「食生蠔普遍會襯白酒，但某些重金屬味、層次複雜的品種，像Pied de Cheval及Belon，我會提議襯香檳，因為其酸度及氣泡至夠力。」Wine and Dine關係密不可分，因此餐廳引入多國佳釀，就連冷門的瑞士甜酒及白酒都有，方便客人開餐時柯打。

銅蠔愈多0愈大隻

　　不止銀碼要睇幾多個0，就連食Belon（銅蠔）都要！冬季就以法國蠔最當造，說到經典品種，豈可不提銅蠔？其口感爽脆，濃郁且帶金屬味，而它更是有分級別的，以名字後的0計算，0愈多，級別愈高，亦代表蠔的歲數愈大，Size也愈大，據說最大的000000可重達200克。

查詢：2808 0418