租定靚車　拜年唔使爭的士

仲有半個月就過年，唔想成家人喺街同人爭的士，最好梗係自己揸車；冇車？唔使愁！最近不少租車公司都相繼推出農曆新年租車套餐，平至$2,200就租到四日三夜。不過，假如閣下平日少揸車，而且路面經驗不足，就切忌逞強，避免揀大馬力車款喇，開車前仲要做足檢查，當然唔好酒後駕駛，咁就可以開心拜年，出平安啦！

唔理你手車有幾叻，揸唔熟悉嘅車，租車時必須問清楚架車點操作，尤其係近年嘅豪華房車，都有大量電子設備，包括電子Handbrake、Auto Hold等等，唔識運用記得問清楚呀！

咪心急　Check清楚先上車

同時，出發前最基本都要Check吓頭燈、水撥及車窗能否正常操作，檢查埋胎氣夠唔夠、車身有冇花痕，發現唔妥就要即刻報畀租車公司跟進。假如一切正常，都唔好「擒擒青」開車走人，記住抄低租車公司嘅緊急聯絡電話，萬一遇到意外或操作問題，都可以搵番佢哋幫手。據經驗所得，過年期間嘅租車需求非常大，七/八人車仲非常搶手，有心自駕拜年，就要早早行動。

租車Check List

1.頭燈、指揮燈；

2.水撥；

3.車窗、車門；

4.中央鎖；

5.胎氣；

6.車身有無傷痕；

7.油蓋打開方式、燃油種類；

8.租車公司緊急聯絡電話；

9.導航系統（如適用）；

10.汽車說明書（如適用）。

熱門推介:小家庭之選（五座位）

Nissan Tiida

雖然係1.5公升小房車，不過空間冠絕同級，車廂長達2,035mm，媲美2.0公升房車，坐滿五個人都唔覺逼狹。至於1.5公升全鋁合金引擎及Xtronic CVT波箱，有成109ps馬力，耗油量亦低至20km/L，走遍港九新界都唔肉赤。

Honda Accord

今代Accord係歷代最豪，車身長達4,945mm，無論空間及設備都拍得住$30、40萬元嘅歐洲車，乘坐質素相當高。安全方面，Accord嘅車身用咗高拉力鋼鑄造，喺NCAP撞擊測試獲得最高嘅五星評級，加埋全車有八個安全氣袋，帶嚟充分保護。

大家族之選（七座位）

Honda Stepwgn

講到型格、實用嘅中型MPV，Stepwgn肯定位列前茅，唔只有同級最大嘅巨型天幕，仲有首創全隱藏式第三排座椅，五座布局時，車尾可騰出極大嘅載物空間。另一方面，Stepwgn用咗低地台設計，配合雙電動趟門，上落車都好輕易。

Toyota Alphard 3.0

想豪氣啲，梗係揀Alphard啦！車身長達4,865mm，而且用料豪華，揸去拜年夠晒氣派。至於三排座椅都有闊落空間，配合中排兩張大班櫈，帶嚟舒適、愜意嘅乘坐感受，而且3.0公升 V6 VVT-i引擎有成220ps馬力，配合五速波箱，坐足七個人都好氣好力。

實用之選（六座位）

Nissan Urvan

貨Van嘅載物空間一定贏晒私家車，過年要載大量年貨嘅話就啱晒。除此之外，近年嘅貨Van已經有自動波，自問揸棍波不精，或者想揸得舒適啲都冇有怕。不過提提你，揸自動波貨Van都要有2號（輕型貨車）牌，得1號牌係唔揸得o架

* 以上收費只適用於2月1日至2月11日，任選4日3夜，於第一日早上10時取車，第四日晚上7時半前交車。

查詢：2768 2277

（大昌行汽車租賃）