《LittleBigPlanet 2》買多支Move過特別關卡
上集《LittleBigPlanet》爆出，麻布公仔Sackboy更成為好多玩家嘅心頭好，真係估唔到歐洲方面都可以開發出一隻角色造型有趣，兼且一家大細都啱玩嘅Casual Game。新推出嘅續集《LittleBigPlanet 2》當然要再諗吓新橋，除咗加好多新裝置氹玩家外，仲唔少得對應埋最新嘅PS Move操控，買多支Move操控器，仲可以玩到好多特別關卡添！
喺遊戲設計上，《LittleBigPlanet 2》同上集其實都大同小異，不過喺細位上都有所強化，好似今集就為主角Sackboy加入好多搞鬼又夠實用嘅新道具同裝置，令過關變得更Easy。
搞鬼裝置 玩出新意
新裝置包括有可以抓住遠方物件搖來搖去嘅鈎爪，又或者是可以將物件提起及掟出嘅強力手套，亦有可射出固體泡泡塞住空間嘅創造槍。但最特別要算係一個名為「直接控制器」嘅新裝置，要知道之前Sackboy只可透過開關間接控制機械裝置嘅運行，操作上都幾費時失事，但今集只要將「直接控制器」安裝到機械裝置上，就可以預先以唔同嘅方向鍵和按鈕組合，做出不同對應動作，操控變得更直接及多變，玩落好有新鮮感。
點粉紅區 啟動機關
其實無論係Move版定傳統手掣版，玩家都係一版過一版咁玩，之不過遊戲過程內會出現粉紅色嘅區域，只要將Move控制器嘅游標指到粉紅區域就可以啟動機關，有機會變成跳板，又或者即時變身成唔同嘅小關卡，好考玩家嘅反應同身手，增添咗唔少趣味。不過話說回來，一個玩家要同時拎住傳統手掣控制Sackboy移動，兼且用Move控制器指住粉紅區域並唔容易，所以遊戲都強調合作玩法，兩個人一齊玩就唔會太手忙腳亂，最多更可支援到四個人齊齊玩。不過玩家要注意Sackboy嘅移動慣性，否則到兩人合作時會較難控制，一不留神就會跌落機關。
自創關卡 Key樣上鏡
遊戲大體上都係繼承自上一代嘅出色設計，收錄咗50個設計有趣嘅關卡，場景畫面亦有進步。上集已有嘅自創關卡模式，今集亦一樣會收錄，玩家可以自己設計出新關卡，自己玩之餘仲可同朋友分享，夠晒有Fun！雖然Sackboy本身已經幾可愛，但大家一樣可以發揮創意，為Sackboy轉過一身型仔造型，如果擁有PS Eye鏡頭（買PS Move時已有附送）的玩家，仲可以想將自己或者朋友個樣拍低Key落Sackboy上，呢條橋應該幾受小朋友歡迎。
遊戲檔案
類 型：動作
開 發：Media Molecule
平 台：PS3
推出日期：1月18日
售 價：$388
查 詢：2341 2356
遊戲共設有約50個關卡，仲可將用家原創嘅關卡跟其他玩家分享。
角色設計同樣以可愛做賣點，氹得小朋友好開心。
《LittleBigPlanet 2》會出埋中英文合版，唔怕睇唔明內容喇！
笨拙又可愛嘅Sackboy已經成為近年PS遊戲嘅新Icon。
用上新裝置鈎爪，遠一遠嘅物件都拎得到。
只要將「直接控制器」安裝落機械裝置，就可簡單地發出各種指令，比上集方便咗好多。
唔知點樣跳過啲恐龍骨？只要用Move點住粉紅區域就會變成跳板彈出去。
場景設計明顯花咗唔少心機，都幾討好。
開始玩時要留意主角嘅移動慣性，要預早少少煞掣先得。
今次粉紅區域會變身成浮板，將主角安全移送到目的地。