Android手機遊戲 打到冇停手

Android手機近年愈嚟愈多人用，喺全球各地都急速擴張，要食住呢轉商機，好多廠商都積極研發Android Apps，而除咗實用程式之外，Android Market仲有大量好玩又過癮嘅遊戲，而且好多仲提供埋免費嘅Lite版，真係打到冇停手！

前排，有好多用家都抱怨Android Market冇付費Apps單撈，兼且分類唔清晰，所以無心機玩！Android就順應民意，繼去年10月底增加更多付費程式嘅地區外，上月仲將Android Market嘅介面大更新，Apps數目當然比之前多好多，搵Apps更方便！

《Find it：The Simpsons》卡通搵錯處

《Find it：The Simpsons》其實只係一隻普通嘅搵錯處遊戲，不過醒目在用上大量過癮卡通，好似呢次就搵嚟抵死嘅Simpsons，每關會顯示出兩幅圖畀你搵錯處，設有過關時限，但必要時都可以睇提示。最正係遊戲商仲開發咗一系列唔同卡通人物嘅版本，好似Hello Kitty、Toy Story，連Twilight都有，梗有一款啱你心水！

下載費用：免費

《Hyper Jump》 金幣變跳台

如果等車、搭車想Kill Time，小記就推薦大家玩《Hyper Jump》。完全冇故事背景，玩家只需要控制一隻類似蜜蜂嘅飛行物體，不斷跳不斷攞金幣就得。蜜蜂要靠金幣先可以維持彈力，所以大家要千方百計搵金幣續命，有時仲會有特別道具幫你飛得更高更遠。

下載費用：免費

《Racing Thunder II》合法鍊車

無論你手車幾辣都好，平日揸車都要守法忍讓，免得超速犯法兼害人。如果想過吓鍊車癮，咁就一定要單撈《Racing Thunder II》。上集推出時已經大獲好評，今次繼續玩極速3D賽車，玩法直接，就係揸住部跑車跑贏其他對手，當然仲可以換車或者「升呢」，兼且支援網上對戰，方便約齊朋友上網挑機！

下載費用：$4.99美元（約HK$39）

《Finger Dance Revolution》手指跳舞機

一睇個名就知係向經典遊戲《Dance Dance Revolution》致敬之作，其實《Finger Dance Revolution》 只係將十幾年前嘅跳舞氈搬上手機，用手指跟住節拍按上、下、左、右就可以過關。雖然內置歌曲唔算太多，好在支援自己Upload歌，將首歌擺落記憶卡就可以直接拉入遊戲，小記就最想入《嗶嗶嗶》喇！

下載費用：免費

《Crazy Snowboard》花式滑雪

相信有玩過滑雪嘅朋友都知，滑雪技術要求高、體力消耗又大，花式滑雪就更難玩！好在《Crazy Snowboard》就輕鬆得多，話到明Crazy，梗係要你喺賽道上做出不同花式動作，難度愈高、分數愈多。如果儲夠一定分數，就會Unlock到滑雪新裝備，到時大家就可以幫個主角換衫、換板！

下載費用：免費

《Bistro Cook》無火煮飯仔

好多女生都鍾意整嘢食，但每次整完都搞到個廚房烏煙瘴氣，真係諗起都覺得麻煩，《Bistro Cook》就可以畀你試吓「無火煮食」。玩家扮演餐廳廚師，客人會不斷落「柯打」，揀啱適當食材煮好兼上碟之餘，仲要留意上菜速度，堆積太多客人就會Game Over，好趕架！

下載費用：免費