《Q群仙傳Online》 改寫民間傳奇

雖然話人在江湖身不由己，但如果厭倦打打殺殺過日子，可以試吓呢隻以「可愛」做賣點嘅武俠Online遊戲《Q群仙傳Online》。遊戲唔使爭名逐利搶武林秘笈，目標係陪同賣相超可愛嘅主角顛覆民間傳奇故事，如改寫《梁祝》嘅不幸結局，可愛得嚟原來都幾感人！

遊戲收錄咗好多大家耳熟能詳嘅民間故事，好似有《梁山伯與祝英台》、《十二生肖》、《白蛇傳》、《桃花女鬥周公》、《哪吒鬧東海》等，而故事入面嘅主人翁都會以Q版造型粉墨登場，陪大家闖蕩江湖。

時空交錯 改變歷史

點解無端端咁多位唔同時代、唔同空間嘅角色會走埋一齊？原來係遊戲入面主宰時空同歷史嘅「無極玄光鏡」碎咗，人界進入咗錯亂嘅時空狀態，所以唔相干嘅角色都因為咁而走入同一個遊戲空間，玩家嘅身份就係令破鏡重圓嘅關鍵。為免玩家誤打誤撞令情況變得更混亂，造型可愛嘅「小女媧」會一直陪住大家度過各種難關，為幸福同正義冒險！

畫工出色 多重結局

遊戲入面嘅世界正處於混沌時期，任何事情都有可能發生，所以開發小組就一改以往Online遊戲嘅單一線性發展，可因應唔同處境發展出多重精彩嘅劇情同結局，譬如可改變梁山伯同祝英台嘅悲慘命運，讓愛情得以開花結果；令到《白蛇傳》內嘅白素貞跟許仙白頭偕老；又或是將十二生肖重新排名，玩法相當有趣。遊戲另一抵讚嘅地方係美術方面做得好出色，用上繽紛夢幻嘅色調描繪了眾多民間傳說嘅場景，如《梁祝》嘅雙飛峽，《白蛇傳》內嘅西湖峰塔及桃花園等等，營造出一個非常有趣可愛嘅3D東方武俠世界。

着古裝 跳勁舞升呢

除咗故事同場景別樹一幟外，《Q群仙傳Online》都開發出一套獨特嘅遊戲系統。最意想不到嘅係古裝人物都突然「勁舞團」上身，會喺「仙舞系統」中不斷跳勁舞提升經驗值同屬性，而唔係靠不斷殺敵升呢。另外，還加入「心情系統」，玩家可以為自創嘅角色創作多種表情，隨心情變化而更換，心情唔好時會變得「嬲爆爆」，提醒其他玩家唔好埋身。至於「情緣系統」令玩家們可以在合作過程中，增添情場歷練值同魅力，話唔定玩完後會變成「情場高手」！

遊戲檔案

類　　型：MMORPG

開　　發：中華網龍

封測日期：已開始

公測日期：待定

網　　址：http://hk.chinesegamer.net/qt/