Ali 開工齋Talk即時護聲
李嘉馨（Ali）憑健康形象同平易近人嘅性格，由最初擔任雜誌模特兒，到變身做電視節目主持，而且體育、家居同旅遊節目樣樣都做得有板有眼，成為炙手可熱嘅女主播！就睇睇佢隨身有咩法寶！
由模特兒變身主持人的Ali話自己可以入到電視圈，其實係機緣巧合，話說她在2008年歐洲國家盃擔任模特兒後，得到推薦，試任體育台節目《體育王》主持人。「講真，初時真係有啲擔心o架，好在自己本身都有睇開英超，足球嘅知識總算合格；籃球同其他運動我有時間就會惡補。雖然唔習慣做主持，但可以畀自己有發揮空間，辛苦啲都冇所謂！」Ali興奮地說。
隨身手袋要夠大
一年後Ali就由體育台調到娛樂台工作，主持嘅節目更多，工作時間當然更加緊密，加上旅遊節目需要出外景，護膚更加唔可以偷懶，所以她每次出街必定要帶備一個大手袋，內裏有齊Hand Cream、香水同唇膏外，仲因為要靠把聲搵食，隨身必備開聲之寶—八仙果，再加埋眼鏡同Cap帽，裝備十足！
Hand Cream 首選天然
「相信好多女仔，差唔多一年365日都搽潤手霜，仲要一日搽幾次，消耗量真係好大，所以我會揀啲無咁貴，但又足夠潤膚嘅Hand Cream，呢支德國潤手霜本身係由植物提煉，夠天然又唔怕有動物油脂咁黏膩。」
護手霜變潤唇膏
「Elizabeth Arden呢支本來係Hand Cream嚟o架，不過試用後發現太滋潤，於是忽發奇想用嚟充當潤唇膏，用後又發現效果真係幾好，而且不含色素，睇落更自然清新，啱我嘅Style！」
開聲必備八仙果
「我嘅工作係主持節目居多，保護聲線極之重要，所以我每次出街都會帶備一樽八仙果，一有唔妥就會食番粒，次次都萬試萬靈o架！」
iPod解悶良伴
「呢部iPod Classic Video 30GB係經典中嘅經典！我仲帶住佢喺身邊，一來係貪佢容量夠大，二來彩色屏幕可以播埋短片，用嚟聽歌睇片解悶之餘，仲可以入埋工作拍攝過嘅短片，畀自己回味一下添！」
輕盈清新香水
「你都見我隨身咁多護膚同化妝品，所以我盡量會揀輕便裝。Voyage d'Hermès香水係我最佳選擇，一來佢體積只有一粒2A電池咁大，二來氣味唔會太濃，只要輕點一下耳背同頸項已經相當足夠呢！」
私家筷子盡力環保
「可能講你都唔信，我隨身都有一對私家筷子，係我有次去台灣買嘅！原因唔係話怕人哋啲筷子唔乾淨，反而係見到佢哋咁多小食店舖，好多都係用即棄既膠碗膠碟同竹筷子，覺得咁樣唔環保，所以就想盡
必揀黑白袋款
「黑白易配搭嘛，如果揀個色彩好搶眼嘅袋，又要買唔同衫配搭，對於返工無定時嘅我嚟講，未必有咁多時間去配襯！」
G9用開有感情
「其實我都幾男仔頭，鍾意睇足球又鍾意影相，呢部G9陪咗我好耐，去過好多地方，所以對佢特別有感情；加上影相可以揀手動模式，想影唔同效果，都可以自己話事。」
太陽鏡防出斑
「皮膚太白很易出雀斑，所以出街我一定要戴太陽眼鏡！仲要大大塊鏡片，咁先保護得夠全面。」
Cap帽遮光最好
「我好怕曬，有時只係戴太陽眼鏡係唔夠，我一定會戴埋帽，而且指定係鴨嘴帽，仲要『鴨嘴』部分可以屈曲方便調校；另外，帽形要比較圓渾，睇落外形先夠靚仔！」