on.cc 東方互動主頁

逢Young必Buy　Toyota Wish 1.8

翻查過去一年嘅本地汽車銷售數字，原來每個月嘅Top 10，起碼有一半係七人車，果然係人氣車款，豐田（Toyota）Wish 1.8仲經常入圍（2010年11月就以107部成為該月最暢銷型號），想做2010嘅七人車銷量王，睇怕都坐亞望冠。Wish 1.8到底有何特別之處，令咁多車迷追捧呢？

雖然七人車愈來愈受歡迎，不過問心嗰句，有幾多時會坐滿人呢？Wish呢類中型級七人車，就切合實際需要。平時用嚟載女友或老婆返工、放工，有小朋友嘅話，載埋佢哋返學都得，前、中排已經夠用；假日想載多幾個朋友郊遊，或者係外父、外母飲早茶，七座布局就大派用場。同大型七人車比，勝在車價同油費都划算得多，空間感亦比小型七人車理想，中庸之道正係Wish嘅吸引之處。

空間編排甚平均

以前嘅中、小型七人車車廂，畀人「夾硬嚟」嘅感覺，尤其是後排似足Dog Seat，不過對Wish 1.8有意思嘅車迷就毋須擔心，因為佢嘅前、中、後座椅空間編排（2+3+2）都好平均，中等身形嘅成年男士都唔怕揀後排。置物量方面，就以筆者呢期鍾意釣魚的人為例，維持七座位布局，車尾行李艙都夠位放魚竿，仲有地台暗格放雜物；收起後排嘅話，唔只放到幾個吹氣魚缸兼氣泵，就連細冰箱都載得落。

易操控力水充足

論實用性，Wish 1.8交足貨，操控方面亦頗得民心。首先，佢用咗房車化嘅底盤設定，而且車身似旅行車，唔似一般高身七人車咁論盡，所以轉彎、泊位都好易Handle，就算你係P牌一族都唔難上手。至於1.8公升直四VALVEMATIC引擎有成144ps馬力，唔只夠力，選用Sport行車模式，仲可以畀你想快跑一段過足癮；想慳油嘅話，亦可改用ECO，行車斯文啲之餘，耗油量仲低至16.7km/L。

修長身段夠瀟灑

以筆者平日所見所聞，Wish 1.8嘅用家大多係年輕一族及小家庭，相信都同佢個Young Look有好大關係。好多人仲當七人車係老土怪、大牛龜，Wish 1.8嘅疑似旅行車造型，相比之下自然瀟灑得多，後生仔揸都唔會嫌Old，尤其是鬼面罩嗰對電鍍「犬齒」，比起見慣見熟嘅橫條形鬼面罩，生鬼得多，如果側鏡加埋指揮燈嘅話，就更省鏡了。