得閒圍脖

科技版記者Alfred：

公司好多男同事都鍾意玩《芒亨》，小記本身都有玩，但只係得閒先開機劈吓怪，所以無論技術同獵人等級都係長期處於超低水平。不過小記玩機戰系遊戲就沉迷得多，差唔多隻隻都有買，當中唔少仲係玩到爆埋機！好似話呢個星期推出嘅《A.C.E Portable》，就有齊好多自己好鍾意嘅卡通，仲要係《芒亨》式接任務推進故事，唔玩又點對得住自己呢？

科技版記者貓科：

《銀河英雄傳說》係小記年輕時最愛嘅日本科幻小說，自1982年推出以來，累積銷量已達1,500萬本，曾推出動畫、漫畫、電玩，至今仍有不少Fans支持。踏入2011年《銀河英雄傳說》於日本青山劇場推出舞台劇版（1月7日至16日），為濃縮劇情，故事作了一定程度的修改，與原著最大分別是完全刪減了楊威利的戲份，而以萊茵哈特為故事重心，對於熟讀原著的朋友來說，肯定有另一番新鮮感。

科技版記者Vincent：

作為阿仙奴嘅死硬派粉絲，眼見到球隊近幾年連一隻盃仔都攞唔到，難免有啲唏噓。近日，阿仙奴官網竟然出現傳奇射手亨利嘅消息，原來他為保持狀態，趁美職聯休季返嚟跟操。想當年，亨利喺左路話推就推，無人能阻，加埋皮利斯、龍格堡呢班技術、鬥心俱備嘅球星，竟然可以喺03至04年度球季不敗封王，夠晒威水！可惜亨利依家都成33歲，惟有寄望班師弟可以從佢身上偷吓師，今季贏番個盃仔嚟慰藉下我哋班球迷啦！