Soul Searcher摺篷迎風
繼日產發布嘅Murano CrossCabriolet後，起亞（KIA）亦炮製出SUV與開篷車嘅混合體—Soul Searcher。驟眼睇，新車外形同原裝Soul分別唔算大，只係鬼面罩及進氣口有少少改動，同埋冇咗霧燈，不過車頂部分變咗做風琴式摺篷；雖然車身兩側仲有B、C柱，唔似見慣嘅開篷車「無上裝」，不過開揚感覺勝過開天窗。性能方面依靠1.6公升直四引擎，配合5前速手波，馬力122ps，除咗有ABS及ESC等主動安全設備，就連iPod連接座及藍芽系統都跟埋，暫定車價為1.4萬美元（折合約11萬港元，未連稅）。
車頂嘅風琴式軟篷夠晒驚喜！
由軚環、座椅同門壁配色都似足傢俬，營造自在、輕鬆嘅氣氛。