on.cc 東方互動主頁

日圓搏命升　B180值得Like

日圓不停升，閣下想去日本旅遊過農曆年嘅話，睇怕要預多啲Budget。不過凡事睇兩面，對車迷嚟講，依家仲唔係出歐洲車嘅好時機？好似平治（Mercedes-Benz）B180，系出名門唔在講，而且1.7型號都只係26萬元有找，加埋實用嘅揭背身段，以及聽晒你話嘅7速CVT加減波箱，抵揸、好玩兼而有之。

自從A-Class面世，平治就擺明車馬打年輕人市場，高銷量亦證明廠方定位準確；隨後推出嘅B-Class，就以更高性能及更實用嘅車身，爭取高要求Hatchback車迷嘅歡心。雖然B180屬於入門型號，不過車廂照樣有大天窗，加埋尾箱容量可以谷到2,245公升，擺幾部摺疊式單車都冇問題。

CVT潤物無聲

性能方面，1.7公升直四引擎都有116hp馬力，扭力亦去到15.8kgm，夾埋AUTOTRONIC 7速CVT加減波箱，夠力又好玩。試車時，起步比較斯文，喺大直路走咗冇耐，就Feel到CVT波箱運作暢順又夠靜，好似喺昂船洲大橋用過100km/h行車，依然冇勞嘈，穩定性又高，就連傳入車內嘅路噪亦少之又少；除此之外，加減波運作亦好聽話，波檔銜接緊密，攻彎大派用場，筆者試過用接近90km/h走大彎路，亦以低速挑戰連串彎位，循迹表現同樣出色。

$1.1/km揸得過

話明係入門級別，B180嘅馬力，當然同B200及B220T有所差別（後兩者嘅馬力係136hp及193hp），不過以116hp推動只有1,320kg嘅車重，綽綽有餘，足以應付香港嘅路面環境，最重要係唔會益咗啲油商嘛！事關B180嘅綜合耗油量只有7.1L/100km，油費計落只係$1.1/km左右，慳番唔少。車價平、油費低之餘，筆者最Like係車廂空間寬敞過人，真係夠位舒舒服服坐足5個人，唔會逼逼夾夾、頂頭頂腳，唔怕屈就屋企人或朋友。