SIC古迦重手三個Look

唔經唔覺SIC系列已經出咗55款,由最初得個樣,一邊玩配件就一邊散晒,到依家點擺點扭都咁實淨,不枉粉絲撐足12年。最新嘅Vol.56古迦(Kuuga)已經在港上架,仲認真重手!除咗有「全能形態」外,仲可以換甲變做黑色「驚異全能形態」,再捲埋自己,攝入甲蟲形戰具「歐拉姆」,重現Decade版古迦,一雞三味;之前肯捱天價都入唔到嘅抽獎版黑色古迦,依家可以用正價買Vol.56補番數啦!

紅變黑 換甲強化

一如以往嘅SIC,呢款古迦無論外形及線條紋理,都好到無話可說。由於古迦本身嘅設定藍本係鍬形蟲,以新世代拉打1號做定位,所以整體造型偏向簡約,就算SIC化都跟足原著,夠晒順眼。而且整體關節都穩陣,鬆緊度適中,手掌位就用咗SHF嘅新關節,能屈能伸。另外跟埋一套黑色盔甲,由紅轉黑,即刻變身做「驚異全能型」。

變甲蟲 跟足劇本

至於隨盒跟嘅鍬形蟲大有名堂,叫做戰具歐拉姆,係古迦平時飛天用嘅交通工具;SIC版本雕模精緻又唔易甩油,雙角同背殼都可以自由打開,收藏設計又跟足Decade版故事,古迦上半身縮入殼,雙腳再拍埋推進器,外面加塊蓋就完成變形,無論係古迦或Decade粉絲,都會Like呢個設計啦!

查詢:2433 1828(瑞華行)

去邊度食聖誕大餐好?
即上on.cc東方互動《享樂聖誕2010》專輯,為您一站式搜羅各類聖誕消費情報!

Alfred

SIC Vol.56 Masked Rider Kuuga(Decade Edition)建議零售價:約$550

隨盒附有直豎拇指組件,擺甫士更神氣。

變身做Decade版古迦,同原裝相比,腰帶唔同咗,仲多把槍。

腰帶黃色崩玉用咗半透明設計,周圍嘅刻線亦相當精細。

甲蟲反肚見到古迦縮入殼個樣,兩隻腳夾住推進器,跟足原著認真搞鬼!

SIC嘅關節可動性真係Fit,單膝出拳等大動作都難佢唔到。