Relax！和菓子啪入口
「嘩，好逼呀！」這是小記去食糖水時，經常講的說話，就算幾好食，只要座位逼逼狹，就想拿拿臨食完走人。最近，天后開了一間專食和菓子的日式甜品店，一室昭和年代舊家居擺設，猶如寬敞平常百姓家，讓大家在營役生活中抖啖氣，一嘗精緻和菓子滋味。
每日生活已經夠緊張，返工放工逼地鐵逼巴士，真係人都癲，若然食都要逼餐飽，真係乜樂趣都冇。曾到日本京都感受東瀛飲食文化的店主亦有同感，故特別在當地的百年和菓子店拜師學藝，把有千年歷史的傳統和菓子引入本土，連同「慢食」文化一併帶進這間甜品小店「瀰月屋」。
昭和擺設 意義深遠
店子開在天后這個甜品店集中地，面積唔算大，但店主就是寧願少做幾枱生意，亦堅持提供寬敞環境。他將店子分成兩部分，入門口右面是一整排的榻榻米座位，盡頭的角落擺放了四腳懷舊電視機及風扇等，營造出家的感覺；左面則模擬昭和年代的街景，從日本搜集古舊的明星海報、廣告貼紙、燈柱電纜等，極有懷舊Feel。原本以為一室裝潢只係扮型之作，但原來另有用意，店主說：「昭和年代是日本戰後經濟大蕭條的時期，而日本人就憑住努力、勤力，令經濟快速復甦，我將呢個時代嘅街景放入舖頭，係要學習日本人做事的態度。」
人手製成 粒粒不同
日本人品嘗傳統和菓子，會邊吃邊欣賞園外風光，再呷一口甘苦的抹茶，寫意到不得了，但店主話香港人未能接受正宗抹茶的濃度，所以他改為提供花茶，並將和菓子的甜度降低。
瀰月屋的出品共有3個系列，先講最傳統的和菓子，包括口感像蒟蒻的葛軟糍、造型多變的爽涼菓、麵條般的瓊脂等，而這裏的出品，每件都由師傅以人手製成，像質感結實的爽涼菓便有不同的造型、味道及餡料；宇治茶巾則是先把豆蓉煲腍後，以人手刮蓉數次，隔除豆的外皮，令質感更幼滑後，再用手巾逐粒逐粒扭製成小袋狀，因此每粒的形狀都不同，感覺好Raw。而湯菓子及洋和菓子兩個系列，則是為了迎合貪新鮮的香港人，前者好似港式糖水，但做法極講究；洋和菓子則是將西式甜品融入其中，例如原個蘋果先以肉桂糖水浸製去芯，再釀入自製的吉士及鋪上酥皮焗製，鬆化中帶爽甜，每日限量十多個，想食便要預訂。
查詢:2806 3389
宇治茶巾 $28
逐粒用手巾仔扭成，用上手磨白豆蓉混入抹茶粉，再混合紅豆蓉，香甜軟糯。
燒番薯菓 $33
激似煨番薯，像真度達99.9%，煙韌的外皮內是軟滑番薯蓉，帶微微焦香，超讚！
爽涼菓 $33
全人手製作，粒粒都有不同形狀和味道，要食番一模一樣？好難囉！
南瓜湯 $28
選用日本南瓜煮製，並放滿鮮百合及南瓜肉，吃時加入南瓜湯，清甜又滋潤。
蘋果批 $38
用肉桂糖水浸過的蘋果，去芯後釀入吉士醬、加酥皮焗製，每日限定，記得訂呀！。
啪番粒和菓子，輕鬆吓先啦！（設計對白）
你唔見我溫緊習咩？（設計對白）
一室懷舊榻榻米布置，予人Relax的感覺，坐到唔捨得走。
店內各式由日本搜購回來的舊物，夠晒Old Skool！
瓊脂 $38
用木筒自行將瓊脂擠成麵條狀，再浸汁食用，有柚子蜜、梅蜜或綠茶汁3種選擇，酸酸哋，好開胃。
泡啤啤 $22
味道像青蘋果汁的泡啤啤絕無酒精，純粹畀小朋友過吓啤酒癮。