抵養　MINI ONE 2011

家吓百物騰貴，同女友食兩餐似樣啲嘅Fine Dining，分分鐘使你幾千銀，肉痛未？有冇諗過咁嘅價錢，已經夠你供車，仲係歐洲車呢！MINI ONE 2011已經大駕抵港，1.6級別只係賣$199,900，同日本嘅1.5車相差唔遠，依家仲有上會優惠，月供可低至$3,800！食少次燭光晚餐就出到MINI，女友應該唔會投訴啩！

其他車就唔敢包，不過出MINI嘅話，相信好易過到女友嗰關，唔只有名牌效應，而且操控易，畀女友揸都好Easy，加埋親民嘅經典Look，夠晒說服力。講起Look，MINI ONE 2011由外到內都繼續「圓美」路線，頭泵把底部嘅入風口稍稍加大，遠睇更似哈哈笑；車廂方面，由錶板、風口到頭枕統統都係圓碌碌，夠Funny。

大扭力低油費

以前嘅MINI ONE用1.4偈，講馬力，難免差啲，不過由去年起已經升呢做1.6，馬力有成98ps，扭力仲去到15.6kgm，當堂好力晒。2011版本冇理由行回頭路吖，呢台咁好力嘅1.6公升直四引擎繼續孭飛，而且幫你慳番唔少油錢，事關佢嘅綜合耗油量只係5.4L/100km，計落即係$0.83/km左右，只要你唔好下下大腳油、段段紅區亂咁轟，MINI ONE 2011都幾抵養o架。

本周車展送彩色側鏡冚

車價低、上會易，月供可低至$3,800，加埋油費低，今、明兩日嘅MINI車展出車（時間早上10時半至晚上7時半，地點尖沙咀海運大廈），再送一對特別版側鏡冚，有粉紅、橙、綠、黃及粉藍等多種顏色任你揀。點襯先至型？除咗睇你嘅潮流觸覺，仲要出手快，事關呢項優惠手快有、手慢冇，仲唔拿拿聲約埋女友蒲車展！

車檔案

車　　型：三門四座位揭背車

引　　擎：直四

容　　積：1,598c.c.

最大馬力：98ps/6,000rpm

最大扭力：15.6kgm/3,000rpm

驅　　動：前置引擎、前輪驅動

傳　　動：六前速自動波

車身體積：3,723×1,467×1,407mm（長×闊×高）

售　　價：$199,900

查　　詢：3193 6800（MINI HK）