High Class野炊 帶齊架生開火

「係唔係有自唔在，攞苦嚟辛？」「求其煮個麵咪算囉，拎咁多架生未得嚟重過？」錯錯錯！能夠偷閒去露營，仲將大自然變成「私家」廚房，無晒油煙味，大條道理喺青葱綠野食餐好。只見野炊（野外煮食）達人切切煮煮，轉頭已經煮好海鮮鍋、燉牛肉，再飲埋靚酒睇風景，同喺餐廳食咁歎！要捱罐頭、即食麵？簡直係「暴殄天物」呀！

放假，有人鍾意行街睇戲，死守室內活動；有人偏愛往外跑，一得閒就去露營，例如來自「大本營」的營友Samuel及Francis，二人都是有十多年經驗的資深分子：「大嶼山、西貢一帶有好多露營熱點，每到露營旺季，去到營地幾乎插針都插唔入呀，營帳貼營帳，好墟冚o架！」

難忘60人結「Fun」營

去露營最少3日2夜，長時間留在營地，睇風景攤抖以外，野炊成為眾人的重點節目。Samuel小時候當童軍，露營開餐自是最簡單的罐頭、即食麵，長大後加入「大本營」，才開始對野炊講究：「最鍾意煎牛扒，簡單方便嘛。其實可以食得好豐富o架，我就食過盆菜、西班牙大鑊飯、煙熏鵪鶉、天婦羅等。」

Samuel最難忘的一次野炊，竟像擺「流水席」般：「有朋友結婚，搞咗個60人的Wedding Camp，每人負責煮一道菜，再各自放喺營前同大家Share。」計計數，60人有60道菜，每樣試一啖都有排食，Samuel笑說最享受邊食邊傾偈。另一邊廂的Francis廚藝了得，野外版西班牙飯及天婦羅便是出自他手，更每次帶來驚喜，這位大廚表示：「通常會煮意粉、意大利飯，重澱粉質夠飽肚。」

氣體爐啱新手用

即使身懷好功夫，都要配合相關裝備，眼見Francis今次做野炊示範，就帶來大冰箱、煮食爐、平底鑊、燃料及餐具等，行裝甚多，頗大陣仗。然而，Samuel表示會視乎人數及菜式，而決定帶哪款煮食用具：「像BBQ要燒烤爐，打邊爐就帶火鍋，煮飯則用雙頭爐，更有營友按需要帶蒸籠、多士爐等隨行。」不過新手入廚的話，Francis說帶Cookset、煮食爐及餐具便已足夠。

一般來說，Cookset可購買輕身易潔的鋁質產品，煮食爐則以酒精及氣體最常用，前者火力細、難以控制，但勝在穩定、環保及寧靜；後者則火力較猛，方便且安全，適合新手使用。Samuel建議大家買用具時，不妨按Budget及人數入貨，初去露營先買最基本、便宜的產品，待有興趣繼續玩，才投資較昂貴的，畢竟器材都是一分錢一分貨，避免浪費金錢。

開爐睇火有技巧

煮食最緊要安全，身處野外，開爐步驟更不能掉以輕心，免釀山火。如煮食爐是使用電子點火，記得先慢慢扭開氣體活門及不要扭至最大火，聽到「Sssssss」聲後便按動電子點火的掣；若不是電子點火的話，便要在爐頭上先點火槍，然後慢慢扭開活門，即可成功開爐，如先開氣體再點火槍，可能有過多氣體積存，導致搶火情況出現，非常危險。

煮食行裝要輕巧

只要到戶外用品專門店，便可買齊野炊用品，像The Overlander，有齊爐具、Cookset及餐具等，以Cookset為例，售價由百多元到過千元不等，視乎品牌及物料而定，可謂豐儉由人。

Samuel私伙Show Off

野炊多年，Samuel的私伙用具一大堆，平日會到戶外用品專門店及日本網站入貨，今次特地帶來了兩件珍藏。

達人開爐DIY

有大自然作背景，野炊樂趣絕非一般入廚可比，Francis表示最緊要注意安全：「例如要留意四周環境是否可以生火；遇風時要為爐頭加風擋；新手應避免炸東西，因火力猛難於控制。」食材方面，他建議揀選不易變壞及難變爛的；另外，清洗、切及醃食物的步驟，可預先在家準備，減少在戶外煮食的工夫，因不是每個營地都有水源的。

匈牙利燉牛肉（4人份）

材料：

牛肋條 1磅

煙肉 2片

洋葱（切絲） 1個

罐頭番茄 1罐

新薯 數個

紅椒粉 1湯匙

海鹽、胡椒粉、番荽碎、百里香、月桂葉 適量

做法：

1.先開爐煎香煙肉，下洋葱絲炒至軟身，再落牛肋條煎封表面。

2.放入番茄及水至蓋過牛肋條，加點海鹽及胡椒粉調味，以及下紅椒粉、百里香、月桂葉，煮滾後收細火，放上蓋煮約1.5小時。

3.夠時間打開蓋，放入新薯及番荽碎後略煮，即可食用。

番茄西班牙腸沙律（4人份）

材料：

西班牙腸 1/2條

乾葱 2粒

番茄 6個

沙律菜 1包

羅勒（清洗後印乾水分）、蒜片、

些厘酒醋及橄欖油、海鹽、胡椒粉 適量

做法：

1.乾葱切片，倒入些厘酒醋浸十多分鐘，然後將醋倒掉，留下乾葱片，備用。

2.番茄切片及羅勒葉切碎，除掉西班牙腸的腸衣，再切厚片。開鑊下橄欖油，放入腸煎熟，下蒜片及些厘酒醋調味。

3.沙律菜及海鹽、胡椒粉、橄欖油、醋拌勻，加入香腸再拌勻即成。

諾曼第海鮮鍋（4人份）

材料：

三文魚（切件） 1磅

比目魚（切件） 1磅

蝦（去殼及腸） 1/2斤

青口（洗淨） 20隻

白酒 1/2支

大葱、西芹 各1條

乾葱 2粒

蘑菇（洗淨，切片） 8隻

忌廉、番荽碎、牛油 適量

做法：

1.白酒倒入鍋裏煮滾，放入青口，青口熟透後撈起去殼，剩青口肉備用。

2.大葱、西芹、乾葱切薄片，全部用牛油炒至軟身，再放入蘑菇片炒熟。

3.煮青口的汁倒進鍋裏，加入三文魚、比目魚、蝦及青口烹調，以忌廉作醬汁，上碟前撒點番荽碎即成。

查詢：2117 1810