2011手提3D遊戲 裸上位

十年前，好多年度預測都用上寇比力克名作《2001太空漫遊》做標題，估唔到過咗十年後嘅2011年，人類真係畀電腦同遊戲機玩到氹氹轉，皆因今年遊戲界嘅重點，首推將於二月底上市嘅任天堂3DS，將裸眼3D顯示技術放落手提遊戲機上，玩到3D遊戲之餘仲可睇埋3D影片，機迷們都幾難有藉口唔買！

去年先興起嘅3D熱潮，今年更席捲遊戲界，除咗配合3D電視玩嘅家用機外，更進化至裸眼3D技術兼進入手提機平台；至於體感遊戲方面，無論係Kinect定PS Move兩大陣營，都會加入更多知名大作，同樣精彩。

3D遊戲

3DS裸眼3.5吋立體影像

去年開始，由PlayStation主力推出3D遊戲，透過新款3D電視來接收立體遊戲畫面，不過目前真正支援3D顯示嘅遊戲並唔多，最出名嘅只係《Gran Turismo 5》，某程度上跟3D電視未夠普及有關，但將3D遊戲應用手提遊戲機上，可能會吸引得多。預定喺二月底推出嘅任天堂3DS，機身上方嘅3.5吋畫面可顯示出3D影像，仲可以透過顯示屏旁邊嘅推桿調校3D顯示景深，最重要係用上裸眼3D顯示技術，毋須佩戴3D眼鏡都能觀看到立體影像。

睇3D片兼影立體相

裸眼顯示方式雖然有佢嘅局限性，例如3DS上方顯示屏嘅解像度原為800×240，但用作3D顯示時，解像度會減半至只有400×240，而且可視角度窄，不過手提遊戲機通常只係一個人對正屏幕打，問題應該唔大，加上3DS定價只係25,000日圓，就算升到10算，都只係$2,500；同時更可當埋3D相機拍攝640×480解像度3D相，點都比買部3D電視抵得多。除咗影相外，任天堂亦跟DreamWorks、Disney同Warner Bros.傾掂在3DS上推出3D電影，搭巴士同搭地鐵時都睇到3D片，都幾爽！

大量名作出3D版

至於3DS嘅遊戲支援方面更唔使擔心，雖然暫時仲未公布首批隨同主機推出嘅遊戲陣營，但係除咗任天堂自己會以《薩爾達時之笛3D》及《Nintendogs + Cats》出戰外，其他大廠如Capcom、Sega、Konami等都會開發對應遊戲，如《Metal Gear Solid》系列、《Street Fighter》系列、《Biohazard》系列同《Super Monkey Ball》系列都預期會推出3DS版本。任天堂仲公布會喺3DS推出一如Wii嘅Virtual Console，可以從中下載以往嘅GameBoy遊戲；加上另設Mii Studio，自創立體Mii公仔，非常多嘢玩。

機檔案

型　　號：任天堂3DS

體　　積：134×74×21mm（摺合時）

重　　量：230g

機身顏色：水藍色、黑色

附送配件：3DS專用Adapter、專用Touch Pen、2GB SD Card

推出日期：2月26日（日本）

　　　　　3月（歐美）

售　　價：25,000日圓（約HK$2,375）

體感遊戲

Kinect：冧死硬派機迷

早前聖誕節同新年期間，日日都見到唔少朋友將玩Kinect嘅相片放上Facebook，足證體感遊戲有幾受落。趕搭到去年體感平台尾班車嘅PlayStation Move，喺對應遊戲方面，暫時都唔及得上Kinect。皆因Kinect除了有唔少啱一家大細齊齊玩嘅Party遊戲外，更會將Kinect嘅全體感操控引入到一啲Hardcore遊戲上，引埋「死硬派」機迷落疊。今年預期會推出嘅重點Kinect遊戲分別有曾在去年E3時做過示範嘅《Kinect Star Wars》、將全體感操控放落賽車模擬嘅《Forza Motorsport 4》，亦有預計在今年內推出嘅機甲大戰《重鐵騎》，認真值得期待。

PS Move：

增加兼容遊戲

至於PlayStation Move方面，控制器除了可當槍當球拍使用外，其實仲有相當的可塑性，但好視乎遊戲開發商嘅取向，只是從現時資料所見，今年專為PS Move開發嘅專用遊戲數量不多，但能兼用嘅就有唔少，如《Killzone 3》及《Infamous 2》，所以未必有足夠能力吸引到玩家花錢購入PS Move系統。至於Wii方面就更加靜，觀乎近來主機銷售數字，可知遊戲內容都幾難有大突破。

不日新作預覽

《Kinect Star Wars》

類型：動作／平台：Kinect

推出日期：今年

有遙控器揸手似激光劍有Feel啲？定係凌空揮劍更Free？上星期就惹來PS高層舌戰，但講到底Kinect星戰都值得期待。

《Michael Jackson:The Experience》

類型：音樂／平台：Kienct、PS3 Move／推出日期：第一季

雖然兩個體感平台都會出《MJ：The Experience》，但點計都係可以做到Moon Walk、向前45度傾斜嘅Kinect版好玩。

《重鐵騎》

類型：射擊／平台：Kinect

推出日期：今年

N年前嘅《鐵騎》用上重型操控器，今次可以徒手操作自然更正！但今年內出唔出到都成問題。

《Forza Motorsport 4》

類型：賽車／平台：Kinect

推出日期：第三季

點樣用體感揸名車，或者《Forza Motorsports 4》可以畀到答案大家。

其他遊戲大作

其實再多花臣都好，對Hardcore機迷嚟講，都係玩番遊戲大作最實際。今年遊戲主流類型都係射擊為主，始終刺激性跟連線對打功能都深受玩家歡迎。今年將會推出嘅射擊遊戲大作，分別有第一季推出嘅《Dead Space 2》、《Crysis 2》、《Killzone 3》、《Homefront》，還有下半年推出嘅《Resistance 3》、《Infamous 2》同《Gears of War 3》等，就算唔玩3D、唔玩體感，今年一樣可以打得精采。

《Gears of War 3》

類型：射擊／平台：Xbox 360

推出時間：秋季

雖然由原本四月推出延至秋季，但《GOW3》絕對係年度最重頭大作，點都要玩！

《Resistance 3》

類型：射擊／平台：PS3

推出時間：9月

今年故事緊接上集劇情，講述上集的生還者在1957年再打異形，多人Online對戰模式仍然頑強。

《Homefront》

類型：射擊／平台：PS3、Xbox 360

推出時間：3月

故事講北韓攻陷美國，在一片廢墟中嘅美國本土開戰，未打先興奮。

《Crysis 2》

類型：射擊／平台：PS3、Xbox 360

推出時間：3月

上集打外星怪物已經贏盡口碑，今集絕對值得期待。

《Infamous 2》

類型：動作／平台：PS3

推出時間：今年

想做好人或壞人？《Infamous 2》移師到好有新奧爾良Feel嘅新城市再嚟善惡之戰。