購物優惠 隨搜得

據說棉花將會漲價，到時買衫要等大減價先捨得出手，其實有不少Apps可幫大家搵着數，不論係衣食住行，只要按個掣就Show晒最新優惠，方便到爆！各位行街精記住單撈以下幾款免費iPhone正Apps，就可以買得盡興！

HKJetso　夠晒互動

打正旗號叫「HKJetso」，着數內容當然係主打，除有熱門同最新話題畀大家挑選外，仲配備互動功能，大家睇完每段優惠資訊都可以作出評分、分享用家感受。若果想掌握更多着數資訊，Apps內更特設「Jetso討論區」同「優惠券分享」，啱晒喜歡互動嘅朋友仔。

講數佬（KongSolo）　周街挖着數

除內置衣食住行嘅優惠資訊外，仲有埋GPS定位同地點查詢功能，只要喺地圖輕輕一點，周圍嘅食肆同購物點就會跳晒出嚟，當中仲包括着數資訊同小遊戲，真係好用又好玩！

行Guide　自建掃貨清單

大家成日都會行街，「行Gudie」呢隻App就最啱用。皆因佢備有GPS定位功能，並可以調校搜尋範圍，直徑由最短嘅500米到最遠嘅1,500米都可以搵到。加上佢嘅介面已細心地分門別類，以及備有書籤功能，搵到好嘢時可以隨時記錄，變成私人購物清單。

BEAMS　新貨睇啱即訂

除歐美品牌外，深受大眾歡迎嘅BEAMS亦推出咗隻新App，除咗可以透過佢知道日本同香港各大分銷店嘅資料外，仲可以連結到官方網站瀏覽最新款式，最正係可以Online訂購日本新款，正呀！

ZARA　靚衫多面睇

身為潮人嘅你，自然想時刻跟貼心愛品牌嘅消息，國際品牌ZARA就非常體貼，因為佢呢個全球性嘅App，除咗可以睇到唔同國家及地區嘅貨品外，更會以唔同角度拍攝每件靚衫，夠晒全面！大家仲可以透過GPS衞星定位功能，得知最近自己附近嘅店舖地址同距離，睇中即買話咁易！

海港城Guide　名店優惠速遞

海港城自去年推出呢個《海港城Guide》iPhone App後，全球已有28個國家嘅用戶下載，仲要長時間穩佔Travel類別單撈榜嘅前10名，可見佢有幾堅；除咗分類成重點推介、商戶目錄同我的最愛等功能，方便大家隨時記低同查詢心水店舖外，仲新增咗相片分享功能，咁就可以即時同朋友分享啦！