雷射雙雄同步拉弓

好彩電玩《機戰》夠Hit，令香港未播過動畫嘅《勇者雷登》，都有唔少人氣；「現代化」嘅《超者雷登》就慘情得多，唔止香港未有得睇，就連日本收視都麻麻哋。Super Robot超合金系列竟然偏向虎山行，兩款雷登打孖上，唔怕變蟹貨咩？

出名識計數嘅Bandai，又點會倒自己米！其實元祖雷登喺日本一直人氣高企，拍得住同輩嘅鐵甲萬能俠及超力電磁俠等經典角色。至於《超者雷登》雖然收視仆直，不過當中嘅神雷登都算幾有型，同樣識變形之餘，金、銀配色仲比元祖雷登Grand得多；《超者雷登》唔出DVD係合情合理，神雷登唔出玩具就嘥啲喎！對忠實嘅雷登迷而言，SR肯兩隻一齊出，相信掌聲會多過噓聲。

元祖雷登　贏人氣輸Parts

無論動畫收唔收得，質素高低先係入貨與否嘅首要考慮。先講SR雷登，基本造型跟超合金魂版本差唔多，雖然細隻得多，好彩合金照樣落足料，心口、腰部、手臂及雙腳都係金屬料，就連手腳連接位都唔例外，關節實淨、穩陣，可惜圓形推進器嘅腳掌改咗塑膠件，加埋個Ball Joint位，令腳部嘅接地性打咗折扣。武器方面都未算完善，只得盾、劍同弓箭，就連心口三連音波炮都冇，唔通想學鐵甲萬能俠1、2號出Boxset附件？

神雷登　誠意鷹爪王

可能驚畀動畫收視低拖累，SR神雷登就喺質素上大打爭氣牌，論細節，比SR雷登抵讚！雖然神雷登嘅合金料比較少，只係集中喺雙腿嘅裝甲、腰間及四肢嘅Ball Joint關節，不過變形設計比雷登好得多，只係簡單換頭拆拳頭，唔似雷登換咁多零件，而且五指鷹爪仲可以獨立活動，加埋靚靚嘅金屬色，畀足誠意！至於招牌嘅拉弓甫士，SR版雷登及神雷登都擺得好似，兩隻擺埋一齊，上演「射鵰雙雄傳」，勁有氣勢，都入得過吖！

有古講

《勇者雷登》係1975-76年嘅機械人動畫，故事講述古文明「姆大陸」嘅皇帝拉．姆，為咗對抗妖魔入侵而開發雷登，後來雷登沉睡於人面岩中，被主角響洸叫番醒，對付妖魔一族。《超者雷登》就係1996年嘅動畫，雖然叫「雷登」，但劇情同《勇者雷登》冇關，反而似足《神勇飛鷹俠》，而且神雷登仲係壞人，不過勝在造型靚仔，因而跑贏班正派主角九條街。

查詢：2433 1828（瑞華行）