得閒圍脖

飲食版記者師傅仔：

過咗聖誕，仲玩松果咁Out？這個並非裝飾，而是真真正正的松果，是表哥仔上個月從德國帶回來做手信。據佢話，將松果安放好後，等到某年某月某日就會爆開，露出內裏的松子，到時就可以食啦……不過呢，等咗幾個禮拜依然毫無動靜，希望這個「跨年度美食」會快啲「作動」爆破，帶來驚喜啦！

汽車版編輯Dick：

穿梭機曾經是科學界和潮流界的前衞Icon，大家可有想過，原來這台將地球與太空連接起來的空中大白鯨，已經服役30年了（1981年試飛、82年首航），想當年，有哪個男生沒有穿梭機的模型或玩具？老兵不死，只是凋零，如無意外的話，穿梭機將於今年中正式退役。原本筆者的2011大計就是積極儲錢，不過1月還未過就要反口了，事關LEGO剛剛推出了一台44cm高的穿梭機，雖然身價近千元，但瀏覽實物圖時，不禁憶起一幕幕穿梭機悲喜交集、全人類集體回憶的震撼場面。算吧，回憶無價，為了珍藏這位老朋友，節衣縮食也在所不惜！

飲食版編輯S.man：

做咗十幾年飲食版，吃過很多珍饈百味，也放過不少「古怪」嘢入口，但最愛還是一大班人圍埋燒吓嘢食、打吓邊爐，因為講到食，我向來覺得「對手」最重要。2010最後一夜，我和至愛跟朋友仔一行廿人到元朗BBQ，以熊熊猛火迎接2011，而當晚最精彩的，是席間有位達人，不但透爐起火勁，還自備蒸餸架、錫紙兜、冬菇、芥蘭、豆卜、鱔片等，將燒烤爐變成打邊爐，升呢食法，引來不少艷羨目光。一年之始就咁有食神，令我覺得好幸福，仲好想將呢份幸福跟大家分享！但願世上每個人都得以溫飽，每日都被愛包圍！