Jawbone JAMBOX磚頭靚聲

出晒名玩Fashion兼靚聲嘅耳機品牌Jawbone，向來深受潮人喜愛。今次就更進一步，推出智能無線喇叭兼擴音器JAMBOX，玩埋磚頭立體聲咁話！

音量大 可裝Apps

JAMBOX雖然盒仔細細，但係發出嘅聲量同音色絕對唔成正比，事關佢內置咗一對強勁嘅聲波驅動器，能夠產生出同真人一樣咁寬闊嘅音頻，高音清、低音準之餘，仲一啲都唔拆，更可以上廠商網站MyTALK「單撈」新Apps，更新如免提通話、電池管理等功能，又有齊7種語言畀大家揀選做語音提示，夠晒個人化！

四邊喇叭 潮到爆

音色有保證不在話下，JAMBOX同傳統揚聲器設計最唔同嘅地方，就係整個機身被橡膠外殼包圍住，而揚聲器系統以不銹鋼結構打造，減少可移除嘅部分，所以體積更纖巧，而且揚聲器四面外露，產生更豐富廣闊嘅聲音，真係離幾尺遠都聽得清清楚楚！依家JAMBOX有齊藍波浪、黑鑽石、灰色六面體同埋紅點４款設計，買齊佢哋返屋企，肯定潮爆。

查詢：2980 8006