on.cc 東方互動主頁

東瀛NeinGrenze　真．模型特效

常見的Lomo相機，嚟嚟去去都係搞吓偏色、高Contrast同埋負片效果，就算過癮少少都係加多個顏色濾鏡、魚眼鏡頭，整埋連環快拍就算數。但日本嘅Premium-gear啱啱推出一款搭載移軸鏡頭嘅NeinGrenze，個掣就能夠拍攝出擁有暗角嘅模型效果，盞鬼到爆！

家陣玩模型效果，絕大多數都係靠軟件模擬出嚟，就算係幾千蚊嘅單反相機亦然，否則就要加裝所費不菲嘅移軸鏡頭。NeinGrenze 5000T最大特點係唔使軟件後製，都可以大玩模型特效同Lomo機嘅招牌暗角效果，夠晒自然。

內置移軸鏡頭

其實移軸鏡嘅主要功能係將光軸旋轉至偏離拍攝平面，令景深變得勁淺，所以原本冇乜景深嘅大廈，拍攝出嚟就會變得好似模型咁。NeinGrenze 5000T罕有地內嵌移軸鏡頭，唔使執相後製都可以拍攝出模型效果，而且唔似其他外加餅仔移軸鏡嘅相機咁生硬，做到主體清晰、周邊朦朧，效果自然得多，小記就用5000T試影街景，出嚟效果直頭成套情景模型咁，玩味十足！

強烈暗角效果

影Lomo嘅朋友都鍾意玩暗角效果，貪張相四隻角烏卒卒，矇查查，可以突出主體，更有意境。以往影暗角Feel都係靠後期製作，有心機嘅就會响鏡頭前套個黑色紙筒，不過統統都係模擬效果，唔係真正由鏡頭拍攝出嚟。NeinGrenze 5000T在鏡頭上加入專利設計，有極自然嘅暗角功能，就算用機背屏幕預覽，都可以清楚感受到佢強烈嘅漸變暗位，完全唔會有邊暗邊光嘅兀突感覺。

VIVID色彩濃艷

Lomo發燒友亦喜歡加強相片嘅色彩對比，由於發色「超錯」，喺色彩繽紛嘅構圖下，顏色便會變得更艷麗搶眼。於是5000T在色彩調校功能中加入咗強烈嘅VIVID色彩，配合埋模型同暗角效果，影出嚟嘅照片別具個人風格！而5000T拍攝嘅相片顏色偏藍，感覺似用咗Agfa CT100菲林，兼有復古褐色同Mono黑白，一張相有幾種色調變化，味道截然不同。不過要留意係5000T嘅ISO只得100同200，大白天影相一定冇問題，至於夜晚開埋內置閃光燈後，效果依然大打折扣。