on.cc 東方互動主頁

撞色冇人有smart fortwo coupe mhd pulse

如果你平時着衫鍾意玩撞色，出車就一定要揀smart fortwo！2011新款式已經抵港，車身多處嘅顏色繼續任你揀，選擇仲由上一代嘅六種變成七種（開篷版仲有紅、藍雙色軟篷）。就以今次測試嘅smart fortwo coupe mhd pulse為例，啡色門柱連窗框襯青色車身，加埋銀色15吋輪圈，出位效果拍得住時裝界嘅換季大作喎！

畀顏色你睇之餘，其實smart fortwo亦好使好用。筆者出Trip去過倫敦、巴黎、法蘭克福等歐洲大城市，都見到呢款車成街都係，原來大部分車主平日都用smart仔代步，貪佢慳油又易泊位，假日遠遊先至改揸其他車；筆者喺德國街頭就見過有smart仔泊喺兩部房車之間條罅，車主甚至唔拉手掣，索性落車用手推啱個位。喺香港就梗係唔好試啦，犯法o架，不過泊位易、轉彎靈活呢個優點，就好啱P牌一族。

車身輕上斜爽住去

話明係fortwo，就唔好批評smart仔載客量細，如果你平時用車只係個人代步需要，最多都係載埋拖友，smart fortwo就Fit晒。性能方面唔使擔心，就以今次測試嘅2011 smart fortwo coupe mhd pulse為例，1.0公升直三Turbo引擎有71hp馬力，扭力達9.4kgm，而且車重只有1,020kg，所以斜路上斜都有心有力。況且香港嘅車速上限只係110km，再大馬力都得物無所用，反而smart仔起步、加速分外醒嘅特點，遇到燈位或塞車，都可以從容應付。

低油費日日揸都得

車身輕、引擎容積細，耗油量又多得去邊？呢個正係smart fortwo嘅強項，smart fortwo coupe mhd pulse嘅官方耗油數字就只有4.2L/100km，以截稿前油價計算，即係$0.63/km，日日揸都唔會肉赤。而且2011新版本加入mhd（Micro Hybrid Drive）功能，停車時，引擎會自動熄火，減少不必要嘅耗油及廢排量，而且mhd可以自行選擇開關，以迎合唔同路況及個人習慣。由於新smart仔咁慳油，所以獲得本地環保稅務優惠，新車價由$99,000起（玩車身撞色或追加隨車設備就要另行計算），相信夾到唔少新牌仔嘅Budget。