一幅式天幕Stepwgn郊遊大曬

唔好怪我貪心，做得MPV車主，唔只個車廂要大，仲要有大天窗，咁先夠開揚！雖然好多MPV都有雙天窗，不過分割式設計，未夠正。本田（Honda）Stepwgn Spada就別樹一格，一幅式天幕面積達1,400×840mm，大過唔少雙天窗，好天日子揸去大帽山Relax充電，無論坐前排或中排，都可以冇遮冇擋，和煦陽光當頭曬！

除咗Sunny，Stepwgn Spada都幾Heavy，咪誤會，唔係話部車重，係負載量大，坐足八個人之餘，三排座椅仲可以靈活收起、放平，而且不設後備輪胎，可以將成排後座收落地台，單車、甚至雙門雪櫃都放得落，更何況係一般嘅郊遊物資。

斜坡起步冇有怕

性能方面，Stepwgn Spada用咗2.0公升直四i-VTEC引擎，配合CVT波箱，馬力及扭力分別去到150ps及19.7kgm，好氣好力。今次試車就沿荃錦公路上大帽山，沿途有唔少修路工程進行中，原本斜路起步都幾易溜後，好彩Stepwgn Spada追加咗斜坡起步輔助系統（Hill Start Assist），鬆開腳掣幾秒都唔會溜後，上山唔使再心驚驚。除此之外，車身穩定系統（VSA）亦係好設計，出現側滑迹象時，就會主動降低引擎動力，並對個別車輪作出制動，幫你撥亂反正。

落山緊記用低波

除咗係郊遊良伴，Stepwgn Spada平日用嚟代步都唔失禮！同升級前相比，Spada版嘅前、後泵把，就連16吋輪圈、電鍍鬼面罩及頂置式尾翼，統統都係跑化新款式，成個Look好動得來又夠Grand。至於軚環加減波都係Spada嘅新裝備，應付彎位多多嘅大帽山，就可以更靈活轉換波檔，過彎更易更爽。不過要提提大家，大帽山路沿途不設街燈，加上路面窄、又冇防撞欄，夜探山頂記緊以安全車速行駛，落山盡量用低波，防止制動過熱失效。

大帽山遊客中心唔係日日開

嚟到大帽山，不妨以大帽山郊野公園為歇腳處，附近有20個左右嘅免費車位，旁邊設有大型燒烤場及遠足研習徑，入口處仲有測試體能設施及遠足安全知識嘅傳意牌，好適合行山初哥。想知更多大帽山郊野公園嘅資料，可到遊客中心打探，不過只喺周六、日及公眾假期開放（年初一、二除外），時間由9:30am至4:30pm，咪記錯摸門釘呀！

車檔案

車　　型： 五門八座位MPV

引　　擎： 直四i-VTEC

容　　積： 1,997c.c.

最大馬力： 150ps/6,200rpm

最大扭力： 19.7kgm/4,200rpm

驅　　動： 前置引擎、前輪驅動

傳　　動： CVT

懸　　掛： （前）麥花臣 （後）H形扭力桿

制　　動： （前）透氣碟 （後）實心碟

售　　價： $309,880

查　　詢： 2827 8622（合群汽車）