數碼教祖回歸HT 12" Kevin Flynn

提到數碼教祖，十居其九諗起Steve Jobs，其實喺佢仲未發迹嘅1982年，迪士尼已經炮製出全球首套CG電影《電子世界爭霸戰》（Tron），戲中男主角Kevin Flynn被電子世界「生吞」，已經被電腦迷奉為Cyberpunk始祖。適逢續集《創戰紀》（Tron Legacy）今期上畫，對科幻電影素有情意結嘅Hot Toys當然鼎力支持，繼主角連Light Cycle套裝後，日前再發表12吋Kevin Flynn，有齊黑白兩款造型連發光地台，夠晒Cyber！

審批一剔過

HT早前發表過主角Sam Flynn嘅1:6珍藏人偶連Light Cycle套裝，實物幾可亂真，不過係純擺設、唔識郁，被網友批評玩味大減。今次嘅12吋Kevin Flynn，正好作為補償，HT揸Fit人Howard話︰「雖然今集演員Jeff Bridges並非第一男主角，不過佢一人分飾老年及後生兩階段，論戲份絕對搶鏡，我們好榮幸攞到佢嘅Figure肖像權。」就首辦所見，由Jeon Young Tae操刀嘅頭雕絕對神似，無論眼神、皺紋及白鬍鬚都貼近戲中造型，稍稍不足只係臉頰過於豐滿，瘦番啲就Perfect。據悉Jeff審批時睇一次已經過關，可想而知佢有幾滿意。

搶眼發光地台

HT嘅強項係着衫公仔，製作Kevin Flynn嘅兩件長袍，當然冇難度，顏色有純白、純黑兩款，衫身仲有暗花，背脊就跟足電影戲服，掛咗同色嘅數據飛碟；同樣為咗忠於原著，只有黑袍Look先有鞋着，白袍係赤腳大叔，所以腳掌經過特別塗裝，現埋血管、細紋，誠意可嘉。另外，以往除非係DX系列，否則多數嘅HT Figure只係跟黑色膠地台，不過今次應迪士尼要求，重新設計一個發光地台，按個掣，表面嘅「TRON」字樣及花紋都會發光，擺喺玩具櫃，一定搶晒其他Figure鏡！

PP:HT MMS 144《Tron Legacy》 1/6 Kevin Flynn

零 售 價 ︰$930

預 訂 價 ︰$890

推出日期 ︰2011年第2至第3季

＊圖中為試辦款式，與正式推出的版本或有少許分別。

查詢︰2388 4677（玩具狂熱）