普天同慶 經濟過節Apps

走出街已經見到周圍好有聖誕氣氛，閒逛一輪後忍唔住買咗幾件聖誕禮物返屋企，銀包大破財。之但係要為iPhone加添聖誕感覺，又唔一定要太破費，以下就介紹幾個免費或者只係需要0.99美元嘅iPhone App，用好經濟嘅價錢就可以過一個快樂聖誕！

今次介紹嘅聖誕節Apps，除了可以幫部iPhone扮靚靚外，仲可以畀大家重拾布置聖誕樹同寫聖誕卡等童年樂趣，加埋應節遊戲同公仔貼紙，好玩又多Fun。

暢遊歐洲聖誕市集《Christmas of World Heritage for iPhone》

費用：0.99美元

要感受濃厚聖誕氣氛，最好當然係飛去歐洲著名聖誕市集，但透過《Christmas of World Heritage for iPhone》，大家都會有身歷其境嘅感覺。當中收錄咗全球歷史最悠久嘅德國Dresden聖誕市集、捷克的布拉格同Cesky Krumlov聖誕市集以及奧地利維也納聖誕市集嘅錄像片段，更有好Match嘅聖誕管弦樂襯底，勁有氣氛。但要留意由於有大量Video片段，程式容量達1.71GB，而且只提供日語配音。

聖誕遊戲大雜燴《Santa's Christmas Village 17-in-1》

費用：0.99美元

呢套收集咗17款迷你遊戲嘅大雜燴式《Santa's Christmas Village 17-in-1》，雖然裏面嘅迷你遊戲都幾熟口熟面，好似有Sudoku數獨、Minesweeper掃地雷同Tic Tac Toe打井之類，但勝在遊戲介面上加入了大量嘅聖誕元素，好似數獨中由1至9的數字變為9款聖誕裝飾，仲有超過25首聖誕歌曲任你聽，抵玩！

手繪電子聖誕卡《Christmas e-Cards》

費用：免費

小記仍然覺得為朋友寄出聖誕卡係一件好窩心嘅事，但考慮到成本同環保因素，都係寄電子聖誕卡好啲。《Christmas e-Cards》收錄咗多款手繪聖誕圖像，解像度更去到1,024×768，喺iPhone 4嗰靚芒上睇都好仔細，仲可以直接在iPhone上寄到朋友嘅手機號碼及電郵地址，方便又窩心！

聖誕公仔貼紙《123 Sticker：Free Christmas Edition for iPhone》

費用：免費

大部分iPhone App都係為大人而設，但聖誕節呢個咁普天同慶嘅大日子，小朋友都好應該一同感受節日氣氛。呢個可以畀大家喺畫面貼上不同聖誕裝飾嘅iPhone App，有成廿幾首童謠做背景音樂，一定可以氹得小朋友或童心未泯嘅大朋友好開心。

布置聖誕樹《My Stuffy Christmas》

費用：免費

小記細細個時好鍾意布置聖誕樹，依家喺iPhone上都可以重拾童趣。《My Stuffy Christmas》設有兩款共26種顏色聖誕樹任大家布置，另外亦提供近百種聖誕裝飾、彩帶、禮物及閃燈畀大家掛上聖誕樹。布置完後又可以將聖誕樹相片上傳到Facebook或Twitter，亦能加入特製的聖誕主題相框再Send畀朋友分享喜悅。

Bling Bling聖誕Look《Christmas Wallpapers & Backgrounds with Xmas Glow Effects》

費用：免費

臨近聖誕當然要幫部iPhone裝身，呢個iPhone App就收藏咗超過1,500幅支援到高解像度Retina HD顯示嘅聖誕靚相，等大家可以幫iPhone轉個應節聖誕Look。嫌一般雪人、聖誕樹相片未夠特別，程式內都有成400幾張用上Glow Effect特效嘅聖誕靚相，將佢哋轉成Wallpaper仲唔夠晒氣氛？