體感Game 聖誕喪Fing狂歡
聽日就係平安夜喇！相信大家應該搵定晒地方開P通頂狂歡啦，唔係上Friend屋企叫到會，就係幫襯樓上Cafe包場癲番晚！一大班後生仔女，唔通仲要圍住張枱玩Board Game咁Old Skool咩，梗係齊齊喪玩呢期大熱嘅體感Party Game，Fing手Fing腳至夠氣氛！
玩Party Game，最緊要兩大元素，第一就係遊戲角色夠熟悉親切，就算唔識玩都夠大家笑餐飽；第二就係操控易玩易明，又支援多人比併，即時與眾同樂。現時三大平台先後推出體感遊戲，任天堂嘅Wii一早飲咗頭啖湯，近期仲有兩隻新Game孖住上，開P必玩。
集體鬥波《Mario Sports Mix》
老實講，呢隻孖寶Sports Game直頭係《Wii Sports》嘅茅招進化版，唔好睇佢只收錄咗籃球、排球、冰上曲棍球同閃避球4種比賽咁少，但勝在所有比賽都支援到最多4人一齊玩，比賽場景更大縮水，四個Friend响咁細嘅地方對戰，球來球往，都咪話唔緊張刺激！另外遊戲分Exhibition及Tourament兩個模式，前者可以自己揀比賽種類與場地，進行二鬥二或三打三比賽；而後者就喺選定3人比賽隊伍後，便會同電腦鬥波，玩淘汰賽贏冠軍。
出茅招 Chok超必
《Mario Sports Mix》唔似普通運動Game咁複雜，用Wii Remote Fing Fing 吓就可以做出控球動作，易玩到極！例如按A、B掣接波，向上揮動Wii Remote射籃；向下揮動Wii Remote就可以打冰上曲棍球，一試都即刻上手。仲有今次比賽完全冇球例，而且每位角色能力不一，只要發揮到各自嘅特殊攻擊技，分分鐘可以改變賽果！好似公主打排球出殺波必殺技時，便會天降心心迷惑玩家，搞到對手唔郁得，到時想攔網都冇可能啦；而Mario就仲屈機，佢嘅必殺技就係「無敵」狀態，即係其他人出超必都冇作用！不過出絕招係有次數限制，記得要好好善用喇。
遊戲檔案
名稱：《Mario Sports Mix》（日文版）
類型：運動
製作：Square Enix
機種：Wii
人數：1-4人
日期：已推出
售價：$399（a）
情侶闖關《Donkey Kong Returns》
呢隻新推出嘅《Donkey Kong Returns》，講述大金剛島火山爆發，島上古怪生物到處搗亂，仲偷晒啲香蕉。為咗拯救海島，大金剛同細細粒嘅迪迪金剛，就要喺具備叢林、海灘、洞窟、森林等超過70種唔同場景嘅島上冒險。由於係傳統橫向動作Game，大部分男仔都駕輕就熟，孖住女友玩玩應該冇失威，但如果咁唔好彩喺同一版連死8次，仲會有隻「救命豬」現身教路，幫你解圍！
儲字母 闖迷宮
除咗傳統嘅攻擊同執蕉執金幣外，遊戲舞合大金剛島中還隱藏咗相當多挑戰元素，例如關卡中會收埋啲拼圖碎片，集齊佢地，就可以得到額外金幣同香蕉，用嚟買開啟隱藏版圖嘅鑰匙。另外，關卡中更有字母收集，當儲齊K、O、N、G四個英文字母，就可以挑戰勁難玩嘅「金剛迷宮」，嗰度機關重重，仲有好多怪物等住大家歷險添！
遊戲檔案
名稱：《Dockey Kong Returns》（日文版）
類型：動作冒險
製作：任天堂
機種：Wii
人數：1-2人
日期：已推出
售價：$449（a）
PS Move七彩波波當槍射
包場開P燈光通常都較暗，拎起支會發光嘅PS Move出嚟Fing住玩，肯定更有氣氛！不過小記最欣賞嘅莫過於佢個槍架配件，易於拆卸不特止，輕身小巧，揸槍手感一流，用嚟玩《Time Crisis》簡直Perfect！
PS Move售價
$339（PS Move控制器）
$229（PS Move導航控制器）
$229（PS Eye）
$119（PS Move槍架）（c）
碌勻全香港《功夫滑仔》
呢款PS Move護航作《功夫滑仔》一推出就帶起香港PS Move熱潮！由於男女主角華人造型，而且大賣以香港場境做遊戲背景，仲要用辦公室轉椅當車碌，翻越障礙過版走勻全香港，玩法超抵死。遊戲入面有成27條賽道咁多，雖然係單機Game，但大班人圍住睇、輪住玩都一樣咁開心！
$298（c）
槍戰三合一《Time Crisis：Razing Storm》
三合一槍Game《Time Crisis：Razing Storm》有齊三隻精選槍Game，分別係系列新作《Time Crisis：Razing Storm》、海盜槍戰作品《Deadstorm Pirates》以及街機經典大作《Time Crisis 4》，兩個人响大電視前合作過版，好似落機舖打咁有Feel！
$999（連PS Move一支、射擊附加配件一把及PS Eye套裝）（c）
喪跳巨Sing《SingStar Dance》
呢款《SingStar Dance》最多支援兩支PS Move玩跳舞遊戲，大家只要跟住畫面做，就可以完成舞蹈，如果兩個人跳，仲可以揀呢個合作模式，好似一對孖公仔咁互相幫手跳舞，夠晒過癮。隨Game仲送多兩支咪，最正係可以透過「Singstore」畀錢買新歌，感覺似唱K。
$268（連兩支咪）（c）
Xbox 360 Kinect 冇手掣玩手勢
依家打機唔一定要用手掣，好似Xbox 360平台上嘅Kinect全新體感遊戲系統，只要對住個體感鏡頭，遊戲就能偵測到玩家嘅一舉一動，打機就更Free。
Kinect售價
$2,499（連4GB XB360主機套裝）（b）
另類冒險《Kinect Adventures！》
已擁有XB360嘅朋友，淨買Kinect時就會送埋呢隻《Kinect Adventures！》，等大家挑戰多達20種驚險刺激嘅冒險旅程，例如可以試吓於急流上用身體控制橡皮艇，左閃右避穿越障礙；又可以體驗喺太空站無重狀態下，一邊用手控制飛行，一邊回收站內嘅水球，成班人肯定玩到o依嘩鬼叫。
$1,169（連Kinect Adventures！套裝）（b）
爭做車神《Kinect Joy Ride》
《Kinect Joy Ride》遊戲中共有7種玩法，好似鍊車模式就提供咗多條賽道，畀最多4位朋友比併加速同入彎技術，而狂飆模式又要鬥快迴避障礙物衝到終點，仲有一個戰鬥賽車模式等大家一邊賽車，一邊執起路上物品掟向對手，聽落係咪有啲似《孖寶賽車》呢？
$259（b）
勁舞Battle《Dance Central》
由開發《Rock Band》系列嘅團隊製作嘅《Dance Central》，既可以跳足30首勁歌熱舞，仲可以計埋消耗咗幾多卡路里，順手減肥添！另外只要喺「Break it Down」先行練習，操Fit後再去挑戰呢個雙人勁舞對決嘅Dance Battle模式，好玩過跳舞機！
$259（b）
查詢：（a）2153 1177、（b）3071 4868、（c）2341 2356
