螢絕Predator 賀沙維攞彩

恭喜恭喜！喺球會同國家隊都踢到曉飛嘅沙維，啱啱被《世界足球》雜誌選為本年度嘅世界足球先生，睇嚟大有機會雙喜臨門，贏埋下個月嘅國際足協金球獎喎！呢位傳球大師唔只人氣旺，而且腳腳當「黃」，事關佢嘅戰靴第10代Predator，最近換咗Sharp到爆嘅螢光黃新色，襯埋「擊球區」及鞋底嘅火辣紅，將沙維嘅致命傳送更加形象化，對手見到，個心仲唔怯一怯？

不經不覺，今代Predator都出咗成年，換色就如Fashion Show，包括黑×紅、黑×藍、黑×黃、白×黃、白×藍、紅×白，以及銀藍色都出過，邊款最好睇？各花入各眼啦，不過論到最搶眼，一定係今次嘅螢光黃×火辣紅，着住佢踢夜波，肯定成為全場焦點啦！

長傳勁射利器

好睇之餘，Predator又好唔好使先？如果你鍾意長傳、罰射球嘅話，Predator就Fit晒，唔只沙維，碧咸、謝拉特、魯爾、尹佩斯，連早前來港仲有波入嘅畢特都係Predator用家，你話掂唔掂？事關Predator裝咗獨門利器，就係腳面內側「擊球區」嘅橡膠面，好似乒乓波球拍嘅反膠粒，加強鞋面同足球嘅摩擦，尤其是射弧形球，更彎、更準，令對手估你唔到。除此之外，外底用埋PowerSpine重心技術，有效加強射門力度，就算你唔「落西」，用腳面直射，個波都可以去得更「行」、更快，後衞同龍門對住佢，反應慢啲都畀佢收死！

F50 adiZero齊齊換Look

除咗Predator，adidas另一款星級波Boot—F50 adiZero，最近都換咗綠色新Look，襯埋粉紅色嘅三間條紋及F50字款，醒目程度拍得住螢光黃嘅Predator，今期逢人過人、勁到屈機嘅熱刺左翼加利夫巴里，就係着住佢令對方食塵囉！

必搶 黃氣波衫

除了換新色之餘，Predator亦同步出咗唔少訓練服飾，包括風褸、長褲，以及練習、比賽都用得嘅波衫及波褲，唔同項目分別用咗專利嘅ClimaCool（透氣）、ClimaProof（防水）及ClimaLite（輕巧）等技術製成，針對用家不同場合需要。筆者就最鍾意黃色款波衫，事關同新色Predator襯到絕嘛！

查詢：2730 0157（adidas）、2317 1686（Futbol Trend）