Janice Man模Art實際行裝

個人的隨身物，或多或少可反映出個人的需要及性格。外貌予人又Cool又的模Art Janice Man，你會以為她是超姿整貪靚的女生，但原來她最着重自己的個人風格，不會隨波逐流，所以她的10件隨身物全都是按自己實際需要而攜帶，不像一般女生成袋多餘的雜物！

最近忙於拍戲的Janice，經常四圍飛，忙得不可開交。剛接下日本品牌Doctor Kits做代言人，要為新產品做宣傳外，還要每日在家抽時間試用，親身感受產品的成效。「其實是最初在日本工作時，當地人介紹我用Doctor Kits，當時已發現護膚效果不俗；到後來品牌真的找我做代言人，再慢慢試用其他產品，知道它們採用的成分很多都是靚材料，增加我做代言人的決心。」

無香不歡

問到她有哪些必備的隨身物，她第一時間答Credit Card，原來她很少帶備大量現金在身，因為工作時不能銀包跟身，所以Credit Card就成為她不能或缺的東西，不論買東西或是食飯，都要靠它。唔講唔知，Janice無香不歡，是以日日香水不離身，因為她想以一種香味作為Icon，讓別人一嗅到這種香氣便會想起自己。

護肌Doctor Kits防曬面霜

「經常影相拍戲，肌膚容易被大光燈和燈箱長時間照射而令膚色變深，加上有時在戶外工作，都會被陽光的UVA和UVB傷害，所以我會帶定防曬霜，以備不時補搽之用，為肌膚全天候做足防曬措施。」

方便Credit Card

「因為工作時較少機會用現金，所以為方便起見會隨身帶住張Credit Card，在大多數的店舖食肆都可以用到。Credit Card又輕又薄，比起一疊紙幣或散銀攜帶起嚟更加方便；仲有唔同銀行會有唔同積分或購物優惠，用Credit Card找數絕對係明智之舉。」

練歌iPod

「拍戲等埋位，搭車或化妝嘅時候，我都鍾意拎部iPod出嚟聽吓歌，聽多啲唔同歌手演繹、唔同種類的歌曲，吸取其他歌手的唱法，再與自己的唱腔比較，這樣才會有進步空間。其實有時好忙想抖抖，聽番首抒情歌，都可Relax一下！」

藏髮西瓜帽

「平日工作成日要Set頭，好傷頭髮，所以閒時出街唔Set頭的日子，我都會戴頂西瓜帽，一來頭髮唔順服的話，可以遮住；二來西瓜帽唔貼頭，就算將頭髮放晒喺帽裏面，都唔會凸起一舊太礙眼；加上好易襯，無論係Girlish或Smart Casual打扮，都襯到。」

保暖頸巾

「女Artists工作着的衫通常都無特別分季節，冬天一樣要着露肩或短袖衫，所以我一定會帶條頸巾保暖，最好大條啲，可以包埋膊頭；上台表演前我就會用頸巾來保溫，臨上台才除下，保暖效果真係唔錯！」

實用Chanel Vintage大袋

「雖然我唔多雜物，但都鍾意用體積較大的手袋。最鍾意拎Chanel的Vintage大手袋，因為本身好鍾意懷舊設計嘅嘢，我覺得Chanel的菱格大袋有點Vintage味道，而且內櫳好寬闊，可以袋到好多嘢，夠實用，所以我經常都用呢個袋。」

健康潤唇膏

「搽潤唇膏是我一年四季都會做的事情，尤其是較乾的秋冬季節。化妝前、飲嘢後都會塗搽一層潤唇膏作保護，同時可滋潤唇部肌膚，撫平唇紋，上唇色都會靚啲！」

有個性Unisex香水

「我覺得香水可以代表屬於你個人的氣味，所以每日都要噴，一到黃昏時候我更會補搽，所以香水一定要跟身。木味或大自然的清新草味，比較中性剛強一點，能夠突出個性，但就唔鍾意過甜的香水，感覺好女仔唔夠特別。」

輕巧數碼相機

「因為微博的熱潮，所以必然帶備一部輕巧的數碼相機在身，隨時拍低工作時的花絮或有紀念價值的人和事。過重太大部的相機，我覺得唔啱女仔拎，如果要影日常生活照，我覺得細部輕巧的數碼相機已足夠。」

闊屏幕Samsung Wave 723手機

「現今資訊非常發達，所以不時要Update自己的資訊，最方便快捷的途徑，就係用手機上網。最鍾意又大又長的闊屏幕手機，上網Check資訊都睇得清清楚楚，而且色彩要夠豐富。最好係考慮到女仔手掌天生較細，機身纖薄易拎，用得輕巧最緊要。」