Logitech太陽能鍵盤裝App測光
手機玩Apps大家就見得多，估唔到連鍵盤等電腦周邊都有App用。Logitech最新推出嘅太陽能無線鍵盤K750，唔單止每次完整充電後，可以用到3個月咁耐，仲有得下載專用嘅Solar App，即時顯示剩餘電量，更備有亮度計測量光度，認真體貼！
零PVC環保設計
只有7.5mm厚嘅薄切K750，內建兩組太陽能電池板及光度感應器，唔理係自然光定室內燈光，都一樣可以用來充電，仲特別採用零PVC結構，連裝機嘅包裝盒都可以100%完全回收，少咗塑膠廢料，兼有助循環再用！除咗以上嘅環保設計外，K750利用自家研發嘅Incurves Keys，凹面薄膜按鍵Fit晒手指形狀，回彈力唔錯，鍵與鍵之間亦有充足空間，完全唔怕按錯掣，加上支援2.4GHz無線技術，打字流暢穩定，完全唔會Lag機或訊號中斷冇反應，抵讚！
查詢：3185 1030
$699
以微型USB接收器作無線傳輸，穩定性更佳。
裝好接收器後，只要按下人臉公仔旁邊嘅熱鍵，就可以即時檢查電量同測光。
原來大家仲可以裝多粒餅電作為後備，萬一長時間曬唔到日光浴都唔怕冇電！
Solar App嘅咪錶形亮度計，當指針指向「哈哈笑」圖案，代表光源充足；而下面就係電池狀態嘅電量指示。