on.cc 東方互動主頁

HP ProBook超強機能冧Pro User男友

仲有三日就到聖誕節，情侶們除咗要諗定去邊度拍拖食大餐外，仲要諗埋送乜禮物畀對方。作為體貼女友，梗係要揀至啱男友心水嘅禮物，今次小記就推介HP新出嘅ProBook 4520s畀大家。顧名思義，ProBook大打專業功能，先有超強嘅硬體機能，再加上內置QuickLook3、3D DriveGuard、File Sanitizer、SpareKey等專業應用程式，啱晒Pro User，男友肯定機不離身！

先前HP都推出過ProBook系列，金屬拉絲機身成為系列特色。不過今次追加香檳金新色，淡淡金色靚仔之餘亦夠睇頭，再加上超強機能，肯定冧盡要求多多嘅男生！

高效機能Powerful

唔少男士都鍾意科技產品，日新月異嘅手機、電腦更加係佢哋嘅貼身物品。如果貿貿然送部10吋Netbook仔畀佢，隨時被彈芒細兼機能差，因為見客始終爭咁啲！不過ProBook就大打專業級規格，內置Core i5-460M處理器，時脈仲去到2.53GHz，加上8GB DDR3記憶體，就算男友鍾意剪片、執相，部機都完全應付得到！而且內置15.6吋高清LED屏幕，以及Radeon HD6370獨立顯示卡，用嚟打機、睇片一樣冇窒格，喺工作之餘都可以輕鬆一下，心思咁細密，男友實讚！

上網電郵夠Quick

男朋友時刻都咁忙，Check Email更加係每日上班時嘅指定動作，不過為咗睇Email，下下要用成分幾鐘Boot機確實太低效率。ProBook就特別內置HP QuickLook3，只要預先設定好電郵帳戶，再喺開機時按實F5鍵，十幾秒就可以進入QuickLook3模式，極速查閱、撰寫Email，啱晒分秒必爭嘅用家！另外，大家仲可以喺開機時長按F6鍵進入HP QuickWeb模式，同樣只需十多秒就可以進入HP自家Browser，小記即場測試，能夠完整載入Flash畫面，非常方便！

資料保護好Safe

既然作為工作用嘅電腦，部機少不免儲存咗唔少機密或重要檔案，一旦唔見咗或者被人偷睇到都幾大件事。好在ProBook內置多種HP獨家嘅防護功能，首先有HP SpareKey，可以用密碼、指紋、面部偵測三種方式驗證身份，保證陌生人唔能夠隨便開機睇資料。其次係專為刪除檔案而設嘅HP File Sanitizer程式，會自動將刪除資料的位置進行覆寫，令到已刪除嘅檔案難以復原，做到徹底刪除嘅效果，機密資料就更有保障啦！另外，仲有HP 3D DriveGuard，可以有效保護硬碟因撞擊、震動而導致資料損毀，啱晒粗手粗腳嘅男生用。