冬至靚湯驅寒
唔經唔覺，今日已經係冬至喇！以前成日聽媽媽講：「冬大過年」，所以呢晚會特別好餸，阿媽仲會煲個驅寒靚湯添！依家身為人妻嘅我，今晚都會整當歸熟附子煲羊肉湯。據講經過炮製嘅附子，性溫味辛、溫腎壯陽，驅寒止痛；當歸更向來有活血止血、補血調經，潤腸通便嘅功效；而羊肉則性溫味甘，可治虛勞寒冷，有補中益氣嘅作用。呢個湯不但驅寒保暖，仲可溫經補腎，好Goodo架！
【當歸熟附子煲羊肉湯（3-4人用）】
材料：當歸20克、熟附子15-20克、羊肉200-300克、生薑4片
製法：當歸及熟附子洗淨待用。羊肉切塊後汆水，將羊肉及其他材料放入瓦煲內，加入2,500毫升清水（約10碗水），以武火煲滾後改文火煲約2小時，棄熟附子，加入適量食鹽即可飲用。
備註：口乾口苦、心煩多夢、舌紅熱者及孕婦不宜服用。
