Boxing Day大戰預告　毒蛇撼獅王

湖人鬥熱火，咁具震撼力嘅戲碼，唔只NBA聯盟識做，安排喺聖誕正日上演（香港時間26日早上6時正），Nike仲專登揀呢場波，作為Zoom Kobe VI嘅首展禮；同場加映以獅王做Logo嘅LeBron 8，就升級做Version 2，仲會換埋X'mas Look；全球數以億計嘅籃球迷睇住呢兩款新鞋做Show，一剔牌認真識擇日子！

既然10月都出咗LeBron 8，Zoom Kobe VI還會遠嗎？湖人一哥Kobe Bryant將會喺主場對熱火場波，首度着上Zoom Kobe VI，而且為應節，仲會係青綠色「Green Mamba」嘅聖誕特別版。咁有噱頭嘅特別版，將於本月28日在港上架。

Zoom Kobe VI　鞋墊自動Fit位

由Zoom Kobe Ⅳ開始嘅低筒及輕量化兩大特色，Zoom Kobe VI亦忠實繼承，以US9為例，重量只有300g，對轉向靈活、速度快嘅高比嚟講，自然如虎添翼，而且前、後腳掌嘅Zoom Air，配合中底嘅Phylon物料，畀到充分嘅緩震效果。至於雙層記憶海綿鞋墊，更係Zoom Kobe VI嘅新賣點，貼腳程度可以根據用家嘅腳形自行調節，腳掌闊或窄都Fit得到。

高比嘅外號係Black Mamba（黑曼巴蛇），兩者嘅共通點，正如Nike運動鞋品創意總監Eric Avar所講：「精準又快速」，Zoom Kobe VI嘅外觀就以Black Mamba為靈感，鞋面大致分為三層，內層係透氣網布、中層係堅韌又輕巧嘅Flywire，外層係聚氨酯（Polyurethane）製成嘅蛇皮圖案，耐磨之餘，仲做到毒蛇上身嘅視覺效果。

LeBron 8 V/2 舒服減磅

熱火方面，既有旗鼓相當嘅LeBron James硬撼高比，占士亦有升級版LeBron 8 V/2拍住上，唔畀Zoom Kobe VI威晒。同升級前相比，最大分別係整個鞋面，由鞋舌、鞋領、鞋側到鞋頭，都用又薄又輕、類似Mesh嘅新物料，取代之前略為厚重嘅皮料，減磅之餘，新物料同Flywire及中層嘅氣孔結合，穩固度及舒適性又再提升。至於覆蓋晒成塊腳板嘅MAX AIR 360氣墊，V/2就百分百沿用，緩震效果堪稱剔牌最強，令占士重錘式Block Shot防守後，再嚟個戰斧式鋤樽，都有更強保護及更快反應。球星、波鞋大比併，就算要未天光就起身，湖人鬥熱火呢場大戰都真係唔睇唔安樂！

查詢：2388 3348、2375 2175