on.cc 東方互動主頁

BMW 118i　門檻低易上車

以前揸寶馬（BMW）多屬高消費人士，但自從2004年推出1系，車價門檻唔只低咗，揭背形象仲夠晒Young，打工仔都啱揸，就以118i為例，$279,000就做到寶馬車主喇！

自從日圓升到似火箭，日系車款嘅平價優勢已經愈嚟愈小，相對而言，歐洲車自然抵買咗。就以寶馬1系為例，由最強嘅135i到入門級116i，代理都入齊，中庸之選就有118i。計計數，118i定價$279,000，唔使$300,000就出到歐洲車，計埋現時嘅低息貸款，就算將車價全數上會，以年利率3.5%、分48月嚟供，每月都係$6,600左右，年輕嘅中產一族可以諗諗喎！

小跑車造型夠Young

點解成日提118i啱後生仔？因為個Look夠Young囉！五門揭背造型嘅動感指數，比傳統三箱式房車高得多，但係實用性不遑多讓，加埋偏矮嘅身形，以及一對貫穿前後嘅有力腰線，成部小跑車咁款。車廂布局走簡約路線，既然主攻年輕用家，又何需桃木裝備營造成熟氣氛？不過簡約唔代表慳料，全車都用咗真皮座椅，駕駛席仲有電動控制功能，尤其是儀錶板附近設有引擎啟動鍵，燃起駕駛者嘅快跑意欲。

中階之選好力又慳油

性能方面，118i用咗2.0公升直四引擎，馬力及扭力分別去到136hp及18.3kgm，波箱係六前速自動波箱。雖然力量表現未算強悍，不過車身夠輕，起步依然爽快直接，加速亦平均有力，而且車身短、重心低，配合最得寶馬迷歡心嘅前置引擎、後輪驅動布局，過彎自得其樂。正正118i屬於同系嘅中階級別，馬力夠使之餘，綜合耗油量又唔會放肆，只係7.6L/100km，以目前油價計算，即係$1.1左右，令閣下嘅出車預算變得更從容。