HT10周年最佳蝙稻
以美式英雄漫畫為題材嘅電影有好多，不過真正稱得經典嘅又有幾多？由鬼材導演Christopher Nolan拍攝嘅一連兩套《蝙蝠俠》，堪稱經典中嘅經典，除咗第二集嘅小丑搶晒鏡，第一集嘅眾多角色都令人留下深刻印象。有見及此，Hot Toys就以《Batmans Begins》嘅一對奸角孖寶—稻草人及妖魔化蝙蝠俠，作為十周年限定Figure嘅最後一炮，全球限量2,000套，蝠迷豈容錯過！
稻草人麻布頭 幾可亂真
早於HT向外公布10周年限定Figure前，坊間已預期《蝙蝠俠》必定榜上有名，只係估唔到會以套裝推出。論人氣，稻草人當然比唔上忍者大師，但作為Figure，佢套瘋人院裝束就夠晒新鮮感，束帶及長袍上嘅火燒效果，好少Figure會有，最正係除咗長袍後，就變番西裝筆挺，而且跟足電影嘅Slim Cut設計。頭雕方面，由Predator嘅造型大師Joseph Tsang操刀，用料並非麻布，不過質感及摺紋都幾可亂真，精彩！唯一可惜係欠缺演員Cillian Murphy嘅頭雕，否則就做到完完全全兩個Look。
蝙蝠俠入魔 成身瀝青
至於蝙蝠俠就首度以妖魔化姿態登場。睇過《Batmans Begins》嘅話，應該記得稻草人被迷幻粉灑中後，眼前嘅蝙蝠俠變成面目猙獰嘅惡魔，Figure就以呢短短幾秒做藍本，Joesph Tsang都話︰「出場時間實在太短，所以落刀時都加入咗自己嘅想像，前後摸索咗三個星期，先做到電影中嘅恐怖感。」依首辦所見，雖然素體由舊蝙蝠俠借用過嚟，但頭雕加入咗獠牙、青筋等Detail位，盔甲仲係重新塗裝瀝青效果，基本上係重新設計，配合蝙蝠袍嘅破爛剪裁，入魔版Batman Demon就應運而生。
Make a Wish賀聖誕
適逢聖誕，梗係要與眾同樂！HT宣布即日起至明年1月2日，凡於Toy Hunters購買任何產品，有機會獲得一張「Make a Wish」許願卡；喺卡上寫上願望後，就可以參加抽獎，合共10位幸運兒及獎品，將於明年1月中旬喺Toy Hunters Facebook Fans Page公布之餘，亦有專人通知領獎，詳情可以落Shop詳細打聽。
查詢︰2388 4677（玩具狂熱）
稻草人採用標準TrueType Body，關節位有30個。
除咗長袍，就變番西裝Look，可惜少咗Cillian Murphy嘅頭雕。
雖然頭雕係啤膠，但係紋理、摺紋似足麻布料，厲害！
軍Boot由比例到細節位都似足真鞋，美中不足係除唔到。
長袍手袖繫有束帶，跟足瘋人院嘅戲服。
HT 1/6 Batman Demon & Scarecrow 零 售 價︰$1,980推出日期︰明年1月（VIP會員可率先購買）
蝙蝠俠沿用過往嘅Batman Body，有啲上重下輕，期待大貨時有改善。
皮帶特別塗咗啞金色，增加舊化效果。
Joseph Tsang向來雕開Predator等生化怪物，今次炮製入魔版蝙蝠俠，可謂手到拿來。