暴力熊聖誕見紅
仲有幾日就到聖誕，搵到心水禮物未？如果你啲Friends，或者另一半係玩具迷，咁就唔使傷腦筋，因為玩具界已經返咗大批應節Items，唔止《多啦A夢》、唐老鴨、My Melody同索柏都換上晒聖誕Look，最過癮係暴力熊Gloomy同佢嘅可憐主人拍檔合演「Bloody X'mas」，勢估唔到普天同慶嘅聖誕節，竟然可以咁血腥！
Gloomy死性不改
熊出沒注意，Gloomy喺聖誕節再次偷襲小主人，仲想搶走埋放滿聖誕禮物嘅大布袋！山口式《暴力熊》嘅聖誕版本，一如以往一Set兩盒，分別有Gloomy及小主人。今次Gloomy變得更污糟，成身染晒血，小主人就換咗聖誕老人裝，跟埋聖誕靴，當做籃放隻BB Gloomy入去。玩開山口式嘅朋友，都知道可動性有幾好高，呢台聖誕場景，你想點擺就點擺！
索柏三缺一照搶
數《One Piece》人氣最高角色，分分鐘索柏仲紅過路菲，過時過節又點少得佢！聽講抵港冇耐、一套四款嘅聖誕版索柏毛公仔已經好賣到缺貨，點解？知唔係可愛賣相人人Like囉，光滑絨面軟綿綿，而且唔黏毛又唔易甩毛，好鬼好攬，相信女仔收到一定開心死！
多啦A夢好笑容
除咗暴力熊及索柏呢啲新勢力，多啦A夢、Melody及唐老鴨都唔執輸，齊齊有聖誕版毛公仔上架，《多啦A夢》仲有兩款笑容你揀。同場加映SEGA嘅Winnie The Pooh擺設，以及SAN-X鬆弛熊聖誕樹，兩款都識發光，用嚟交換禮物，收到嘅幸運兒一定有驚喜！
查詢：2148 9483（精品）
山口式聖誕版暴力熊及小主人 $198/個
Gloomy一邊壓制小主人，一邊怒搶禮物袋。
Gloomy Set包括禮物袋同聖誕帽，雖然Gloomy滿面血漬，仍然無損佢懶天真嘅模樣。
小主人Set就跟聖誕襪同BB Gloomy，主人額頭滲晒血，真慘情！
《多啦A夢》聖誕版毛公仔 $118/個
屬於日本版嘅夾公仔機禮物，質素比亞洲版好得多。
唐老鴨聖誕版毛公仔$128
Melody聖誕版毛公仔$110
SEGA Winnie the Poon聖誕發光擺設$118
鬆弛熊聖誕樹發光擺設 $118