蘇真真×智海論盡細路仔
究竟當今的細路仔係屬於可愛定邪惡呢？智海創作的《花花世界》，主角花花天真無邪，跟爸爸一唱一和叫人窩心；另一邊廂，蘇真真的《潮童樂園》，細路肉體內藏大人的蠱惑，乞人憎的同時又叫人會心微笑。今次難得正邪兩派共聚一堂，當然要對細路仔的種種交流一番啦！
智：智海 蘇：蘇真真 Q：記者
Q1：為何有興趣創作兒童漫畫？
智 ：睇新聞發現家長對小朋友好緊張兼諸多限制，腦海中便出現一個乜都包容、樂意陪細路玩，甚至幫手諗埋如何更盡興的爸爸角色。加上創作《花》之時正「煲」緊《牛仔》，發覺坊間冇乜呢類題材的漫畫，於是便決定一試。
蘇 ：本身係老師，之前教小學，現在教中學，日日對住一班細路，發現現在的細路跟想像差好遠，外表純真，但所作所為卻相當蠱惑，如此環境下讓我創作出《潮》系漫畫。
Q2：從哪裏得到創作靈感？
智 ：主要透過觀察街外同親戚的細路，從他們的行動試圖理解箇中玩法並進行聯想，例如小朋友搭火車時，可以對住扶手又玩又跳舞，樂在其中，完全忽視大人應有的規矩，但我覺得幾有趣。
蘇 ：有諗過走純真路線，但我畫的公仔實在太樣衰，跟純真根本唔夾，最後將故事改為細路仔做衰嘢。我認為細路仔有好多面，做衰嘢其實係模仿大人的所作所為，某程度可以話從細路身上睇到大人的邪惡一面，所以大人睇《潮》會有共鳴，而且由細路演繹，感覺會來得更明顯、更誇張。
Q3：點睇彼此的細路漫畫？
智 ：真真筆下細路的蠱惑想法我無諗過，幾有趣，睇得好開心。另外，鍾意佢未純熟的筆觸，畫畫世界係扮靚容易扮醜難，希望佢更努力去做自己。
蘇 ：睇《花花世界》會令我諗起《牛仔》，如此溫情的感覺是如今漫畫中難以看到的，加上主角是細路女，令我覺得更可愛，感覺更Sweet，甚至令我有衝動想生個女！
Q4：現在的細路跟你們那一代有乜分別?
蘇 ：無可否認比以前精叻，以前我喺學校會好驚老師，現在學生們都會好主動講自己的種種或其他人的壞話；另外，以往的細路無咁多嘢諗，好多資訊都需要透過大人、老師才可獲得，現在的細路透過上網想知乜都得，曾經有學生跟我大談槍械及坦克車的知識呢！
智 ：小時候有好多細路喺街玩，足球場甚至多人多到要爭用籃球場來踢波，一心想用大場要「的起心肝」晨早6點起身跟隊，現在街上及遊樂場都幾乎無細路蹤影，佢哋彷彿淨係識得上網。另外，現在的細路明顯辛苦咗，當年我讀小學就算有再多的功課都可以很快完成。我認為依家大人期望多咗，無論是揀學校或去補習，感覺上細路一早就爭到頭崩額裂。我細個只想跟心儀的女生升上同一中學罷了。
Q5：對當下的細路有咩忠告？
智 ：去打波游水踩單車吧！玩到攰就早啲瞓。現在的細路好夜瞓，某程度係屈喺屋企上網，無乜體力消耗所以早瞓唔到，所以痛快的玩個夠吧！
蘇 ：現在的細路太複雜了，家長要求細路將自己的期望完成，卻未必係細路真正的渴望。其實一個幸福家庭未必需要太多，愈簡單愈有溫情。細路仔其實「簡單快樂」四個字就足夠。
後記：童年寶物
這趟訪問到了智海的工作室進行，當大家興高采烈地詳談着細路的種種時，智海忽然搬出了一張推斷為80年代專畀細路坐、可摺合的台灣製枱連櫈。精美之處是枱面印上了「九因歌」等小時候必學知識，感覺既懷舊又有型，如此古董傑作，智海竟然話於垃圾房拾回來，直教人恨得牙癢癢，就連蘇真真也忍不住要影相留念呢！
蘇真真Profile
別號： 蘇真真
年齡：20+
狀況：未婚
職業：漫畫家、作家、教師
強項：畫核突畫
嗜好：儲舊嘢
＊ 除了本身的教書寫作畫漫畫外，這陣子在構思《潮語卡》的iPhone Apps，不過要做到發聲效果原來比想像中煩好多。
松隆子＝自己
早前看了電影《告白》，戲本身吸引之餘，由於本身係教師，睇到松隆子上堂時的情況，覺得好真實。
復古電子錶
最近買了隻新電子錶，可開蓋的復古式鮮艷設計加上《反斗奇兵》的胡迪圖案，加起來可謂一絕。
智海Profile
別號：智海
年齡：30+
狀況：未婚
職業：漫畫家
強項：畫畫
嗜好：看書
＊ 正忙於為作家洛楓的新小說畫插畫，亦為舊作《默示錄》再版重新繪畫封面，明年1月會飛去法國參加安古蘭漫畫展。
《告白》夠緊湊
早前看了電影《告白》，雖然我不太喜歡日本人偏灰的想法，但電影本身還是拍得相當緊湊，好睇！
精美電鑽盒子
為家裏的電鑽找一個合適的盒子不是易事，早陣子終於給我買到，相當精美呢！
蘇真真跟智海都是畫兒童漫畫，但無論風格及對細路的睇法都各有己見。
依家啲細路淨係識上網！
細路外表純真，內裏蠱惑！
蘇真真
智海
