名廚主理 親民價京川滬菜

都甚麼年代了，還以為「星級名店」、「名廚主理」高不可攀？連新的車胎人指南都有大量地道美食，幾十蚊人人歎得到，名廚當然也可開「副線」食店，大賣實惠菜式。就像「名人坊」行政總廚鄭錦富，在銅鑼灣開設的「富哥廚房」，布置新派，主打京川滬菜，即叫即做拉麵最平賣二十幾蚊，明攻年輕人市場，一道「燈影牛肉」，更加功架盡顯，卻五十蚊有找，抵晒！

這位人稱富哥的名廚，來頭絕對不小，曾當富豪家廚20年，很多達官貴人、大明星亦嘗過他的手藝，其自創的燕窩釀鳳翼更個個叫好，新近的威水史是，「名人坊」升格為米芝蓮兩星食府。

全白色調 清雅舒服

「富哥廚房」是富哥新開的另一家餐廳，從外頭看，全白色調，清雅舒服，還可將一排排的落地玻璃窗全部打開，變成Side Walk，絕對是非一般中菜館；內裏亦是新派布置，不乏像白襯銀的中式櫃、金屬燈籠等，非常新潮，令人眼前一亮，引來不少年輕顧客。

富哥最擅長烹調粵菜，鮑參翅肚、家常小菜通通難不到他，還愛炮製像燕窩釀鳳翼、百花釀蟹箝一類的手工菜，今回監製的新餐廳卻是主打京川滬菜，何解？富哥話：「選址銅鑼灣，附近又多購物地方，都想走年輕人路線，眼見他們普遍對京川滬菜都好受落，就以此作主打。」

蘭州拉麵 即叫即做

他還補充像拉麵、涼菜一類食物，上菜速度較快，啱晒年輕人。「食完仲有時間繼續行街買嘢嘛。」富哥笑說。雖然是以快打快，但一如富哥烹調宗旨，材料唔靚唔用，還特意請來地道廚師，保證口味正宗。推介有即叫即做的蘭州拉麵，麵條爽口煙韌，湯頭足料兼長時間熬製，認真製作，蘭州拉麵每碗竟只賣$28，抵食！

涼菜、小炒、湯羹亦是做得一絲不苟，像薄可透光的燈影牛肉，香辣好食；夫妻肺片盡顯刀章，特別入味；酸辣湯齊備酸、辣、香，更可逐位柯打。雖則是京川滬天下，餐廳亦有一系列粵式點心，即叫即做，款式跟名人坊一樣，但勝在價錢親民，再飲杯桂香三花茶，混合了玫瑰花、茉莉花及桂花，氣味清香，為豐富一餐作平衡。

查詢：2701 9800